Намояндагони ВАО бо хизматрасониҳои алоқаи барқӣ дар вилояти Суғд шинос мешаванд

ДУШАНБЕ, 26.06.2025 /АМИТ «Ховар»/. Аз 26 то 28 июни соли равон бахшида Рӯзи Ваҳдати миллӣ Хадамоти алоқа дар ҳамкорӣ бо ширкатҳои мобилии МегаФон Тоҷикистон, Tcell, Вавилон-М ва ZET-MOBILE ба чанд минтақаи вилояти Суғд сафари сайёҳиву эҷодӣ барои намояндагони воситаҳои ахбори омма ташкил мекунад. Дар ин хусус ба АМИТ «Ховар» аз Хадамоти алоқаи назди Ҳукуматии Ҷумҳурии Тоҷикистон хабар доданд.

Намояндагони воситаҳои ахбори омма дар шаҳру ноҳияҳои Панҷакент, Истаравшан, Хуҷанд ва Гулистон маконҳои сайёҳиву фароғатиро тамошо намуда, ҳамзамон бо фаъолияти истгоҳҳои базавии алоқаи барқӣ, вазъи хидматрасонӣ дар марказҳои хизматрасонӣ, марказҳои минтақавии ширкатҳои мобилӣ ва дигар фаъолиятҳои марбут ба соҳаи алоқа шинос мешаванд.

Хотиррасон мешавем, ки мақсади асосии сафари сайёҳиву эҷодии намояндагони ВАО ба чанд минтақаи вилояти Суғд бозгӯ намудани нақши Ваҳдати миллӣ дар рушди соҳаи алоқа мебошад.