Дар шаҳри Гулистон сохтмони корхонаҳо ва васлу насби дастгоҳу таҷҳизоти муосир идома дорад

ДУШАНБЕ, 16.08.2025. /АМИТ «Ховар»/. Раиси вилояти Суғд дар шаҳри Гулистон бо ҷараёни сохтмон ва васлу насби дастгоҳу таҷҳизоти муосир дар якчанд корхонаи саноатӣ шинос гардид. Дар ин хусус ба АМИТ «Ховар» аз хадамоти матбуоти Раиси вилояти Суғд хабар доданд.

Ҷамъияти дорои масъулияти маҳдуди «Тиглат» яке аз корхонаҳои нави саноатӣ буда, дар он рангҳои сохтмонӣ ва хокаҳои ороишию пардоздиҳӣ истеҳсол карда мешаванд. Дар айни замон сохтмони биноҳои ёрирасон ва васлу насби дастгоҳҳо идома дошта, баъди ба кор даромадани коргоҳ 70 нафар сокинони маҳаллӣ бо ҷои кори доимӣ таъмин мегарданд.

Раиси вилоят бунёди чунин хатҳои истеҳсолиро қадами устувор дар татбиқи ҳадафи стратегии саноатикунонии босуръати мамлакат унвон намуд. Масъулин вазифадор карда шуданд, ки пеш аз ҳама, ба сифати маҳсулоти ниҳоӣ таваҷҷуҳи бештар зоҳир намоянд, зеро талабот ба маҳсулоти сохтмонӣ дар бозори дохилӣ хеле баланд аст.

Сипас, роҳбари вилоят бо фаъолияти Ҷамъияти саҳомии кушодаи «Қолинҳои Қайроққум» шинос шуд. Ҳоло дар корхона сохтмони боз як хати нави истеҳсолӣ ва воридсозии дастгоҳҳои муосири қолинбофӣ аз кишвари Белгия идома дорад. Иқтидори ин дастгоҳ истеҳсоли то 4 ҳазор метри мураббаъ қолин дар як шабонарӯз ва то 120 ҳазор метри мураббаъ дар як моҳ мебошад. Бо ба кор андохтани хати нав иқтидори солонаи корхона ба 4 миллион метри мураббаъ расонида мешавад.

«Қолинҳои Қайроққум» аз ҷумлаи корхонаҳои муваффақи вилоят ба шумор рафта, маҳсулоти он бо сифату зебоӣ ва нақшу нигори миллӣ дар бозорҳои дохилӣ ва хориҷӣ талаботи зиёд дорад. Дар айни замон дар корхона 500 сокини маҳаллӣ бо кори доимӣ ва маоши хуб таъмин мебошанд.

Изҳор гардид, ки иқтидори нави истеҳсолӣ ба рушди иқтисод, афзоиши ҷойи кор ва қонеъсозии талаботи бозор мусоидат менамояд.

АКС: Хадамоти матбуоти Раиси вилояти Суғд