Масъалаи ташкили ковишҳои бостоншиносӣ дар мавзеи «Дараи Алмосӣ» баррасӣ гардид

ДУШАНБЕ, 18.08.2025 /АМИТ «Ховар»/. Дар Душанбе зимни мулоқоти Директори Осорхонаи миллии Тоҷикистон Зафаршо Иброҳимзода бо Сафири Фавқулода ва Мухтори Ҷумҳурии Федеративии Олмон дар Ҷумҳурии Тоҷикистон Йорк Шуграф ва ҳайати илмӣ таҳти роҳбарии доктор Свения Бонманн аз Донишгоҳи Кёлн масъалаи ташкили ковишҳои бостоншиносӣ дар мавзеи «Дараи Алмосӣ» баррасӣ гардид, иттилоъ медиҳад АМИТ «Ховар» бо истинод ба Осорхонаи миллии Тоҷикистон.

Зафаршо Иброҳимзода аҳамияти ин вохӯриро барои таҳкими ҳамкории дуҷонибаи фарҳангӣ ва илмӣ таъкид намуд. Ҳамзамон доир ба нақша ва шароити баргузории ковишҳои бостоншиносӣ дар мавзеи «Дараи Алмосӣ» маълумот дода шуд.

Директори Осорхонаи миллӣ гуфт, ки мавзеи мазкур дорои мероси ғании таърихиву фарҳангӣ буда, аз замонҳои хеле қадим то имрӯз боқӣ мондааст. Зимни суҳбат аз ёдгориҳои таърихии Дараи Алмосӣ ва Ҳалқаҷар дар Тоҷикистон ва ёдгориҳои Работак ва Миси Айнаки Афғонистон ёдоварӣ карда шуд, ки аз онҳо осори катибадор бо хати бохтарӣ кашф гардидааст.

Натиҷаҳои экспедитсияи муштарак дар нашрияҳои миллӣ ва байналмилалии илмӣ чоп хоҳанд шуд, ки имкон медиҳанд ёдгориҳои нодир ба ҷомеаи ҷаҳонӣ муаррифӣ карда шаванд. Омӯзиши бозёфтҳои ин мавзеъ метавонад марҳилаи муҳими омӯзиши таъриху анъана ва хату забони сулолаи Кушониён гардад. Таҷрибаи мутахассисони олмонӣ дар соҳаи хониши хатҳои қадим, аз ҷумла хати бохтарӣ имкон медиҳад, ки оид ба ин давра маълумоти дақиқтари илмӣ ба даст оварда шавад.

Бостоншиносони олмонӣ гуфтанд, ки давраи сулолаи Кушониён таваҷҷуҳи бузурги муҳаққиқонро дар саросари ҷаҳон ба худ ҷалб намудааст. Натиҷаҳои омӯзиши ин макон метавонад ҷомеаи ҷаҳонро бо таърихи ғании худ ба ҳайрат орад.

Дар анҷоми мулоқот Йорк Шуграф ва ҳамроҳонаш толорҳои экспозитсионии Осорхонаи миллии Тоҷикистонро тамошо намуданд.

АКС: Осорхонаи миллии Тоҷикистон