Ҳунарҳои мардумӣ бо усули «хона ба хона» ва «маҳалла ба маҳалла» тарғиб карда шуданд

ДУШАНБЕ, 31.08.2025 /АМИТ «Ховар»/. Бо мақсади татбиқи дастуру супоришҳои Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон оид ба захираи маводи озуқаворӣ, соҳибкасб гардонидани аҳолӣ, бахусус занону духтарон, роҳбарият ва масъулини ноҳияи Синои пойтахт бо усули «хона ба хона» ва «маҳалла ба маҳалла» бо шароити зиндагӣ ва захираи маводи ғизоии сокинони маҳаллаи Шараф барои фасли зимистон шинос шуданд. Дар ин хусус АМИТ «Ховар» бо истинод ба Мақомоти иҷроияи ҳокимияти давлатии ноҳияи Сино иттилоъ медиҳад.

Иброз гардид, ки духтарону занони ин маҳалла ҳунару маҳорати худро дар кадбонугӣ, пухтани нонҳои гуногун ва таомҳои миллӣ, инчунин омода намудани афшура ва консерваҳо аз сабзавоту меваҷот, ки барои фасли зимистон захира мегарданд, муаррифӣ намуданд.

Чунин шиносоӣ дар маҳаллаҳо тибқи нақшаи чорабиниҳои Мақомоти иҷроияи ҳокимияти давлатии ноҳияи Сино доир шуда, ҳадафи он тарғиби анъанаю ҳунарҳои мардумӣ, эҳёи хӯрокҳои миллӣ, захираи хӯрокворӣ барои мавсими зимистон ва таъмини амнияти озуқавории аҳолӣ мебошад.

АКС: Мақомоти иҷроияи ҳокимияти давлатии ноҳияи Сино