Ба ифтихори 34-солагии Истиқлоли давлатӣ дар ҷамоатҳои шаҳраку деҳоти ноҳияи Рашт барномаҳои идона доир карда шуданд

РАШТ, 07.09.2025 /АМИТ «Ховар»/. Ба муносибати 34-солагии ҷашни Истиқлоли давлатӣ дар ҷамоатҳои шаҳраку деҳоти ноҳияи Рашт чорабиниҳои тантанавӣ баргузор гардиданд. Дар ин хусус ба мухбири минтақавии АМИТ «Ховар» Субҳониддини Маҳмуд аз Мақомоти иҷроияи ҳокимияти давлатии ноҳияи Рашт иттилоъ доданд.

Раиси ноҳияи Рашт Зарина Идизода иброз намуд, ки давоми34 сол Тоҷикистон сиёсати дохилӣ ва хориҷии худро мустақилона муайян ва муваффақона амалӣ намуда, ба сӯи фардои осудаву обод устуворона қадам мегузорад. Маҳз таҳти роҳбариву роҳнамоиҳои Президенти Ҷумҳурии Тоҷикистон муҳтарам Эмомалӣ Раҳмон ва дар натиҷаи заҳмати содиқонаю ватандӯстонаи сокинони сарбаланди мамлакат пойдевори давлати навини тоҷикон ҳамчун давлати демократӣ, ҳуқуқбунёд, дунявӣ ва иҷтимоӣ гузошта шуд, мамлакати мо дар арсаи ҷаҳон эътироф гардид. Муҳимтар аз ҳама, барои пешрафти ҳама соҳаҳои ҳаёти ҷомеа ва боз ҳам беҳтар гардидани сатҳу сифати зиндагии аҳолӣ шароити мусоид фароҳам оварда шуд.

Зимни барномаҳо соҳибкорону фаъолони ҷамоатҳои деҳот аз ҷониби раиси ноҳия бо Сипосномаю туҳфаҳо қадрдонӣ карда шуданд.

Инчунин аз тарафи ҳунармандони шуъбаи фарҳанги ноҳия барномаҳои рангини фарҳангӣ манзури сокинони деҳот  гардиданд.

 АКС: Мақомоти иҷроияи ҳокимияти давлатии ноҳияи Рашт