Мусобиқаи байналмилалӣ оид ба камонварӣ ҷамъбаст гардид

ДУШАНБЕ, 11.10.2025. /АМИТ «Ховар»/. Дар Мактаби махсуси варзишӣ оид ба намудҳои камонварии вилояти Суғд Мусобиқаи сеюми байналмилалӣ оид ба камонварӣ барои дарёфти «Ҷоми Президенти Ҷумҳурии Тоҷикистон» ҷамъбаст гардид.

Тавре аз хадамоти матбуоти Раиси вилояти Суғд ба АМИТ «Ховар» иттилоъ доданд, Мусобиқаи сеюми байналмилалӣ оид ба камонварӣ барои дарёфти «Ҷоми Президенти Ҷумҳурии Тоҷикистон» аз 6 то 9 октябр доир гардид.

Дар мусобиқаи бонуфузи сатҳи байналмилалӣ беш аз 100 нафар варзишгарон ва мураббиён аз Тоҷикистон, Федератсияи Русия, Узбекистон, Қазоқистон, Қирғизистон, Бангладеш ва Ироқ дар ду намуд — камонварии классикӣ ва камонварии муосир рақобат намуданд.

Баргузории чунин мусобиқаи сатҳи байналмилалӣ дар вилояти Суғд боиси болоравии сатҳи маҳорати варзишгарони тоҷик ва муаррифии шоистаи Тоҷикистон дар арсаи ҷаҳонӣ мегардад.

АКС: Хадамоти матбуоти Раиси вилояти Суғд