Раёсат дар Иттиҳоди Давлатҳои Мустақил дар соли 2026 ба Туркманистон гузашт

ДУШАНБЕ, 10.10.2025 /АМИТ «Ховар»/. Шуруъ аз 1 январи соли 2026 раёсат дар Иттиҳоди Давлатҳои Мустақил ба Туркманистон гузашт. Дар ин хусус имрӯз зимни нишасти матбуотӣ доир ба ҷамъбасти ҷаласаи Шурои сарони кишварҳои аъзои Иттиҳоди Давлатҳои Мустақил иттилоъ дода шуд.
Тавре қаблан хабар додем, имрӯз дар Қасри миллат таҳти раёсати Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ҷаласаи Шурои сарони кишварҳои аъзои Иттиҳоди Давлатҳои Мустақил доир гардид.
Дар ҷаласа Пешвои миллат муҳтарам Эмомалӣ Раҳмон таъкид намуданд, ки Тоҷикистон дар соли раёсати худ дар Иттиҳод дар ҳамкории зич бо кишварҳои иштирокдор ва Кумитаи иҷроия барои татбиқи самараноки ҳадафҳои пешбинишуда фаъолияти фарогирро идома дод.
Ҳамзамон дар ҷаласа масоили мубрами ҳамкории муштарак дар соҳаи амният, аз ҷумла мубориза бо терроризму экстремизм ва таҳкими ҳамкории сарҳадию низомӣ баррасӣ гардид.
Бо қарори сарони кишварҳои аъзои Иттиҳод Сергей Лебедев барои як давраи дигар Дабири кулли Иттиҳоди Давлатҳои Мустақил таъйин гардид.