«ЗАБОН ДОНӢ — ҶАҲОН ДОНӢ». Ғолибони озмуни ҷумҳуриявӣ аз рӯйи 12 равия қадрдонӣ карда шуданд

ДУШАНБЕ, 06.10.2025. /АМИТ «Ховар»/. Дар Донишгоҳи байналмилалии забонҳои хориҷии Тоҷикистон ба номи Сотим Улуғзода таҳти унвони «Забон донӣ – ҷаҳон донӣ» барои дарёфти «Ҷоми раёсати Донишгоҳи байналмилалии забонҳои хориҷии Тоҷикистон ба номи Сотим Улуғзода» маросими ҷоизасупории Озмуни ҷумҳуриявии донишҷӯёни муассисаҳои таҳсилоти олии касбии Ҷумҳурии Тоҷикистон баргузор гардид. Дар ин хусус ба АМИТ «Ховар» аз ин донишгоҳ хабар доданд.

Дар озмун 118 донишҷӯ аз 28 муассисаи таълимии олии мамлакат аз рӯйи 12 забон иштирок намуд.

Иштирокчиёни озмун аз  рӯйи забонҳои тоҷикӣ, русӣ, англисӣ, чинӣ, олмонӣ, фаронсавӣ, арабӣ, ҷопонӣ, куриёӣ, форсӣ, узбекӣ ва ҳиндӣ донишу  маҳорат санҷиданд.

Ғолибон аз рӯйи 12 равия муайян гардида, бо «Ҷоми раёсати Донишгоҳи байналмилалии забонҳои хориҷии Тоҷикистон ба номи Сотим Улуғзода», Диплом ва мукофоти пулӣ қадрдонӣ гардиданд.

Ёдовар мешавем, ки Озмуни ҷумҳуриявии «Забон донӣ – ҷаҳон донӣ» дар партави дастуру супоришҳои Пешвои миллат муҳтарам Эмомалӣ Раҳмон вобаста ба омӯзиши забонҳои хориҷӣ гузаронида шуд.

Ҳадафи асосии озмун татбиқи сиёсати Ҳукумати мамлакат барои  омӯзиш ва рушди забони давлатӣ ва забонҳои хориҷӣ, баланд бардоштани шавқу ҳаваси донишҷӯёни муассисаҳои таҳсилоти олии касбии Ҷумҳурии Тоҷикистон ба омӯзиши забони давлатӣ ва забонҳои хориҷӣ, рушди малакаи забономӯзӣ ва истифодаи он дар иқтисодиёти давлат, дарёфти донишҷӯёни лаёқатманд ва ҷалби онҳо ба корҳои тарҷумонӣ ва илмӣ-таҳқиқотӣ мебошад.

АКС: Донишгоҳи байналмилалии забонҳои хориҷии Тоҷикистон ба номи Сотим Улуғзода