35-СОЛАГИИ ИСТИҚЛОЛИ ДАВЛАТӢ. 14 километр роҳҳои мошингарди ноҳияи Ҷайҳун таъмиру навсозӣ гардид

ДУШАНБЕ, 02.11.2025 /АМИТ «Ховар»/. Дар 10 моҳи соли равон дар ноҳияи Ҷайҳуни вилояти Хатлон 14 километр роҳи мошингарди байни деҳаҳо мумфарш ва даҳҳо километри дигар сангфарш гардида, барои гузаронидани таъмири асосӣ омода карда шуданд. Маҷмуан, маблағи корҳои роҳсозӣ дар ноҳия 7 миллиону 506 ҳазор сомониро дар бар мегирад. Дар ин хусус АМИТ «Ховар» бо истинод ба хадамоти Раиси вилояти Хатлон иттилоъ медиҳад.

Таъмиру навсозии роҳҳои мазкур бо мусоидати Мақомоти иҷроияи ҳокимияти давлатии ноҳияи Ҷайҳун, Идораи давлатии нигоҳдории роҳҳои мошингарди ин ноҳия дар ҳамбастагӣ бо соҳибкорону шахсони саховатманд ва дастгирии сокинон ба анҷом расиданд.

Роҳи деҳаи Орзуи Ҷамоати деҳоти Қумсангири ноҳияи Ҷайҳун, ки солҳои зиёд ба таъмиру навсозӣ ниёз дошт, бо ҳисагузории соҳибкорон ва тариқи ҳашари дастаҷамъонаи сокинон пурра ва хушсифат мумфарш гардид.
Ҳамчунин 1,7 километр роҳи аҳамияти маҳалидоштаи деҳаи Лоҳутии Ҷамоати деҳоти Истиқлоли ноҳия низ баъди навсозӣ мавриди истифода қарор дода шуд.

Сокинони деҳаи Лоҳутӣ тавонистанд, ки то имрӯз ҳудуди 2 километр роҳи мошингарди деҳаашонро мумфарш карда, ба талаботи ҳаракати воситаҳои нақлиёт мусоид гардонанд.

Мавриди ёдоварӣ аст, ки бахшида ба ҷашни бузурги миллӣ- 35-солагии Истиқлолияти давлатӣ сокинони ҷамоатҳои шаҳраку деҳоти ноҳияи Ҷайҳун аз ҳамдигар таҷриба карда, пайи ҳам роҳҳои ҳудуди деҳу маҳаллаҳоро тавассути ҳиссагузории дастаҷамъона мумфарш карда, ҳамчунин ҷароғонкунӣ, навсозии ҷуйборҳои обпартои канори роҳҳо ва дигар амалҳои марбутаро анҷом медиҳанд.

АКС: Хадамоти матбуоти Раиси вилояти Хатлон