Донишгоҳи миллии Тоҷикистон ҳамкориро бо Донишгоҳи омӯзгории Синзян тақвият мебахшад

ДУШАНБЕ, 13.11.2025 /АМИТ «Ховар»/. 11 ноябр ректори Донишгоҳи миллии Тоҷикистон Эмомалӣ Насриддинзода бо ректори Донишгоҳи омӯзгории Синзяни Ҷумҳурии Мардумии Чин мулоқот намуд. Дар ин хусус АМИТ «Ховар» бо истинод ба Донишгоҳи миллии Тоҷикистон хабар медиҳад.

Зимни мулоқот масъалаҳои гуногуни ҳамкории илмӣ ва таълимии ду донишгоҳ мавриди баррасӣ қарор гирифтанд. Ҷонибҳо изҳори омодагӣ намуданд, ки барои тавсеаи робитаҳои мутақобил иқдоми муштаракро амалӣ созанд.

Таъкид шуд, ки бо талошу иқдоми пайвастаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва Раиси Ҷумҳурии Мардумии Чин Си Ҷинпин ҳамкории ду давлат дар соҳаи маориф ва илм босуръат рушд менамояд. Дар ин замина зарур шумурда шуд, ки робитаҳои илмӣ ва таълимии Донишгоҳи миллии Тоҷикистон ва Донишгоҳи омӯзгории Синзян боз ҳам тақвият дода шаванд.

Зимни мулоқот диққати асосӣ ба роҳандозии ҳамкории илмӣ дар самтҳои иқтисодиёт, информатика, зеҳни сунъӣ, биология ва экология, дорусозӣ ва дигар илмҳои бунёдӣ равона гардид. Ҷонибҳо изҳори омодагӣ намуданд, ки табодули академии омӯзгорон, таҳқиқоти муштараки илмӣ ва чорабиниҳои илмиро ба роҳ монанд.

АКС: Донишгоҳи миллии Тоҷикистон