Масъалаи тақвияти ҳамкории «Амонатбонк» бо Хазинаи байналмилалии асъор дар Душанбе баррасӣ шуд

ДУШАНБЕ, 05.11.2025 /АМИТ «Ховар»/. Масоили марбут ба тавсеаи ҳамкории дуҷониба байни «Амонатбонк» ва Хазинаи  Байналмилалии Асъор дар мулоқоти раиси Раёсати Корхонаи воҳиди давлатии Бонки амонатгузории Ҷумҳурии Тоҷикистон «Амонатбонк» Алиҷон Салимзода бо ҳайати Хазинаи байналмилалии асъор дар шаҳри Душанбе баррасӣ гардид. Дар ин хусус АМИТ «Ховар» бо истинод ба «Амонатбонк» иттилоъ медиҳад.

Тибқи иттилои манбаъ, раиси Раёсати «Амонатбонк»  аз натиҷаи фаъолияти Бонк дар 9 моҳи сипаригардидаи соли 2025 маълумот пешниҳод намуд.

Алиҷон Салимзода иброз дошт, ки «Амонатбонк» ҳамчун институти молиявии давлатӣ ва яке аз бонкҳои низомсози Тоҷикистон дар  доираи амалӣ намудани барномаҳои давлатӣ, фаъолияти густурда дорад.

Дар  мулоқот ҷонибҳо масоили васеи ҳамкории дуҷониба, аз қабили бизнес-модели Бонк, сарчашмаҳои даромад, хароҷотҳо барои маблағгузорӣ ва иҷрои уҳдадориҳо дар назди мизоҷон, масоили сармоягузорӣ, қарздиҳӣ, риояи талаботи низомҳои байналмилалӣ ва комплаенсро мавриди баррасӣ қарор доданд.

Баррасии вазъи бахши молиявии «Амонатбонк» дар 9 моҳи соли 2025 бо дарназардошти таъсири омилҳои беруна, инчунин арзёбии дурнамои ҳамкории оянда бо Хазинаи байналмилалии асъор аз ҳадафҳои асосии мулоқот арзёбӣ гардид.

Дар маҷмуъ,  мулоқот дар фазои ҳамдигарфаҳмӣ баргузор гардида, ҷонибҳо барои рушди минбаъдаи ҳамкориҳо омодагии худро изҳор намуданд.

            АКС: «Амонатбонк»