Намояндагони Донишгоҳи давлатии Кӯлоб дар мусобиқаи ҷумҳуриявӣ 4 медали тилло ба даст оварданд

ДУШАНБЕ, 21.11.2025 /АМИТ «Ховар»/. Бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон ва Федератсияи варзиши вазнини Ҷумҳурии Тоҷикистон дар шаҳри Кӯлоб мусобиқаи ҷумҳуриявӣ оид ба варзиши вазнин (байни мардон ва занон) ба гиромидошти хотираи собиқадори соҳаи варзиш Нуридинов Аслиддин баргузор гардид. Дар ин хусус ба АМИТ «Ховар» аз Донишгоҳи давлатии Кӯлоб ба номи Абуабдуллоҳи Рӯдакӣ хабар доданд.

Дар мусобиқа намояндагони Донишгоҳи давлатии Кӯлоб иштирок намуда, натиҷаҳои баланд нишон доданд. Аз ҷумла, докторанти кафедраи тарбияи ҷисмонӣ ва методикаи таълим Баҳриддин Нуриддинов дар вазни 73 кг бо нишон додани маҳорати баланд ҷойи якумро соҳиб гардид.

Ҳамчунин донишҷӯи курси дуюми факултети тарбияи ҷисмонӣ ва омодагии дифои ҳарбӣ Худобахш Сангаков дар вазни 61 кг ва донишҷӯи курси дуюми ҳамин факултет Худойдод  Ҳакимов дар вазни 89 кг мақоми якумро ба даст оварданд.

Донишҷӯи курси дуюми факултети молиявию иқтисодӣ Неъмат Зарифов дар вазни 81 кг сазовори ҷойи якум гардида, бо Диплом ва медали тиллои мусобиқа қадрдонӣ карда шуд.

Ба даст овардани чор мақоми якум аз ҷониби намояндагони Донишгоҳи давлатии Кӯлоб дар вазнҳои мухталиф нишондиҳандаи рушди устувори варзиш ва фаъолияти пурсамари варзишгарони донишгоҳ мебошад.

АКС: Донишгоҳи давлатии Кӯлоб ба номи Абуабдуллоҳи Рӯдакӣ