«ШОҲНОМА-ГАНҶИНАИ ҲИКМАТУ ХИРАД». Дар ноҳияи Рӯдакӣ маҳфили илмӣ-адабӣ доир шуд

ДУШАНБЕ, 30.11.2025 /АМИТ «Ховар»/. Дар Коллеҷи техникию омӯзгории ноҳияи Рӯдакӣ бо мақсади арҷгузорӣ ба мероси безаволи сухансарои бузурги тоҷик Абулқосим Фирдавсӣ таҳти унвони «Шоҳнома-ганҷинаи ҳикмату хирад» маҳфили илмӣ-адабӣ баргузор шуд, хабар медиҳад АМИТ «Ховар» бо истинод ба ин коллеҷ.

Дар маҳфил доир ба ҳаёт ва эҷодиёти Абулқосим Фирдавсӣ, нақши «Шоҳнома» дар ташаккули худшиносии миллӣ ва арзиши ин асари безавол дар тарбияи насли наврас маърузаҳои илмӣ пешниҳод гардиданд. Донишҷӯён аз «Шоҳнома» порчаҳо қироат карда,  аз достонҳои Рустаму Суҳроб ва Сиёвуш саҳнаҳо намоиш доданд, ки ба чорабинӣ шукуҳ бахшид.

Таъкид гардид, ки «Шоҳнома» на танҳо ёдгории нодири адабӣ, балки мактаби бузурги ахлоқ, ватандӯстӣ ва хирадпарварӣ мебошад. Чунин чорабиниҳо дар баланд бардоштани ҳисси ифтихори миллӣ ва тақвияти ҷаҳонбинии насли ҷавон нақши муҳим доранд.

АКС: Коллеҷи техникию омӯзгории ноҳияи Рӯдакӣ