Варзишгарони тоҷик дар Бозиҳои 6-уми ҳамбастагии исломӣ-2025 соҳиби ҳашт медал шуданд
ДУШАНБЕ, 21.11.2025 /АМИТ «Ховар»/. Паҳлавони тоҷик Абдулмаҷид Кудиев дар вазни 65 кг дар Бозиҳои 6-уми ҳамбастагии исломӣ-2025 дар шаҳри Риёзи Арабистони Саудӣ соҳиби медали нуқра гардид. Дар ин хусус ба АМИТ «Ховар» аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон хабар доданд.
Дар финали мусобиқа Абдулмаҷид Кудиев аз варзишгари ботаҷрибаи Ҷумҳурии Исломии Эрон Раҳмон Амузод бо ҳисоби 12:2 мағлуб гардида, сазовори медали нуқра шуд.
Ба ҷуз аз медали Абдулмаҷид Кудиев то имрӯз дастаи мунтахаби Тоҷикистон дар ин бозиҳо соҳиби 8 медал гардидааст: се медали нуқра ва 5 биринҷӣ. Чор медали аввалро паҳлавонони тоҷик аз намуди гӯштини ҷудо ба даст оварда буданд. Медали панҷуми биринҷиро варзишгари ҷавон Саъдӣ Исмоилов аз намуди тенниси рӯйи миз соҳиб шуд.
Хотиррасон мешавем, ки паҳлавонони тоҷик Темур Раҳимов дар вазни то +100 кг ва Мадина Қурбонзода дар вазни то 52 кг дар Бозиҳои 6-уми ҳамбастагии исломӣ-2025 дар шаҳри Риёзи Арабистони Саудӣ аз намуди гӯштини ҷудо медалҳои нуқра ба даст оварданд. Ду варзишгари тоҷик- Ҷаҳонгир Маҷидов дар вазни то 100 кг ва Абубакр Шеров дар вазни то 73 кг соҳиби медалҳои биринҷӣ гардиданд.
Дар мусобиқаи гӯштини кураш, ки бори аввал ба барномаи Бозиҳои ҳамбастагии исломӣ дохил шуд, варзишгарони тоҷик Шоҳида Қаландарова дар вазни то 70 кило ва Муҳаммадшариф Наҷмиддинов дар вазни то 81 кило ду медали биринҷӣ гирифтанд.
Дар мусобиқа аз рӯи барномаи Бозиҳо аз Тоҷикистон 65 варзишгар дар 10 намуди варзиш, ба монанди бокс, вазнбардорӣ, варзиши сабук, гӯштини озод ва юнону румӣ, камонварӣ, кураш, таэквондо, тенниси рӯи миз, ҷудо, инчунин навъҳои паралимпӣ иштирок намуданд.
Дар маҷмуъ варзишгарони тоҷик дар Бозиҳои ҳамбастагии исломӣ то имрӯз 23 медал (1 медали тилло, 7 нуқра ва 15 биринҷӣ) ба даст оварданд. Ягона медали тиллоро варзишгари маъруфи тоҷик Дилшод Назаров дар аввалин Бозиҳои ҳамбастагии исломӣ, ки соли 2005 дар Арабистони Саудӣ баргузор шуда буд, аз намуди гурзандозӣ соҳиб шуд.
Меҳрони ҚУРБОН,
шореҳи варзиши АМИТ «Ховар»
АКС аз манбаъҳои боз
Дар Москва бахшида ба Рӯзи Ваҳдати миллӣ Мусобиқа оид ба футболи хурд таҳти унвони «Ҳамбастагӣ-2026» баргузор шуд
Дар ноҳияи Шаҳринав Маркази рушди бокс ва майдони варзишӣ ба истифода дода шуд
Дар деҳаи Себистони ноҳияи Данғара майдончаи варзишӣ ба истифода дода шуд
Дастаи мунтахаби Тоҷикистон оид ба футбол дар раддабандии нави ФИФА мақоми 101-умро соҳиб гардид
Дар Бадахшон лигаи волейбол байни мардон оғоз гардид
Дастаи мунтахаби Тоҷикистон оид ба футбол дар бозии дӯстона тими миллии Ҳиндустонро мағлуб кард
Варзишгар аз Тоҷикистон Абдулмаҷид Кудиев дар Узбекистон медали тиллоро сазовор шуд
ФУТБОЛ. Дастаи олимпии Тоҷикистон (U-23) бо ҳамсолони худ аз Чин бозиҳои дӯстона баргузор мекунад
Ғолибони Чемпионати Осиё оид ба бокс қадрдонӣ карда шуданд
Ҳайати дастаи мунтахаби Тоҷикистон оид ба футбол барои бозиҳои дӯстона бо тими мунтахаби Ҳиндустон муайян гардид
ФУТБОЛ. Дастаи мунтахаби Тоҷикистон бо тими мунтахаби Ҳиндустон бозиҳои дӯстона анҷом медиҳад
Дар Ёвон гулгашти фарҳангию фароғатӣ бо муҷассамаи «Рамзи футбол» ба истифода дода шуд
