Дар дараи Искандаркӯли ноҳияи Айнӣ муассисаи томактабӣ бунёд карда мешавад

ДУШАНБЕ, 04.12.2025 /АМИТ «Ховар»/. Бо мақсади рушди инфрасохтори иҷтимоӣ ва беҳтар гардонидани шароити таълиму тарбияи кӯдакон дар дараи зебоманзари Искандаркӯл сохтмони муассисаи томактабӣ оғоз гардид. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Айнӣ хабар доданд.

Муассисаи навбунёд 342,79 метри мураббаъро ташкил намуда, аз ду ошёна иборат аст. Он бо тарҳи муосир ва ҷавобгӯ ба стандартҳои меъёрии бинокорӣ бунёд мегардад. Муассисаи томактабӣ ҷавобгӯи талаботи замони муосир буда, дар он барои кӯдакон муҳити мусоид ва шароити муносиб фароҳам оварда мешавад.

Бо ташаббус ва ғамхориҳои Президенти Ҷумҳурии Тоҷикистон муҳтарам Эмомалӣ Раҳмон дар тамоми соҳаҳои ҳаёти мамлакат, аз ҷумла маориф имрӯзҳо корҳои созандагӣ вусъат меёбанд. Пешвои миллат муҳтарам Эмомалӣ Раҳмон пайваста таъкид менамоянд, ки «кӯдакон ояндаи давлати моянд ва барои онҳо бояд беҳтарин шароит муҳайё гардад».

АКС: Мақомоти иҷроияи ҳокимияти давлатии ноҳияи Айнӣ