Сарвари давлат Эмомалӣ Раҳмон дар ноҳияи Ҷалолиддини Балхӣ бо лоиҳаи бунёди Маркази агрологистикӣ шинос шуданд

ДУШАНБЕ, 25.12.2025 /АМИТ «Ховар»/. 25 декабр Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар идомаи сафари корӣ ба вилояти Хатлон аз ноҳияи Ҷайҳун ба ноҳияи Ҷалолиддини Балхӣ ташриф оварданд.

Сафари кории Сарвари давлат дар ноҳияи Ҷалолиддини Балхӣ аз шиносоӣ бо лоиҳаи бунёди Маркази агрологистикӣ оғоз ёфт.

Марказ дар самти ҷамъоварӣ, нигоҳдорӣ, коркард, андозабандӣ, бастабандӣ ва содироти намудҳои гуногуни маҳсулоти кишоварзӣ фаъолият хоҳад кард.

Маркази агрологистикӣ аз бинои асосӣ, анборҳо ва сардхонаҳои муосир, ошхона бо 48 ҷойи нишаст ва дигар иншооти ёрирасон иборат мебошад.

Иттилоъ дода шуд, ки корҳои сохтмонӣ дар иншооти мазкур моҳи июни соли ҷорӣ оғоз гардида, анҷоми пурраи он то моҳи ноябри соли 2026 ба нақша гирифта шудааст.

Зимни муаррифии лоиҳаи ангоравии Маркази агрологистикӣ ба Сарвари давлат иттилоъ дода шуд, ки дар марказ се хати муосири андозабандӣ ва бастабандӣ фаъол мегардад.

Пас аз мавриди истифода қарор гирифтани Маркази агрологистикӣ 67 нафар бо кор таъмин мегарданд, ки аз ин шумора 40 нафар кормандони мавсимӣ мебошанд.

Таъкид гардид, ки бунёди чунин марказ пеш аз ҳама ба такмили занҷираи таъминоти маҳсулоти кишоварзӣ, коҳиш додани талафот, баланд бардоштани самаранокии фаъолияти агробизнес ва афзоиши содироти маҳсулоти кишоварзӣ ва ашёи хом мусоидат хоҳад кард.

Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон зимни суҳбат бо масъулин ва бинокорон ҷиҳати дар муҳлатҳои муайяншуда ва бо сифати баланд анҷом додани корҳои сохтмонӣ, инчунин ба як маркази муосири ҷамъоварӣ, нигоҳдорӣ, коркард, бастабандӣ ва содироти маҳсулоти кишоварзӣ табдил додани ин иншоот, дастуру супоришҳои мушаххас доданд.