Бахшида ба ҷашни Сада дар Донишкадаи байналмилалии Левакант ҳамоиши ҷумҳуриявӣ баргузор гардид

ДУШАНБЕ, 31.01.2026 /АМИТ «Ховар»/. 30 январ дар Донишкадаи байналмилалии Леваканти Донишгоҳи байналмилалии сайёҳӣ ва соҳибкории Тоҷикистон таҳти унвони «Сада – оине аз таърихи тамаддуни мардуми ориёитабор» ҳамоиши ҷумҳуриявии илмӣ — фарҳангӣ баргузор шуд.

Тавре АМИТ «Ховар» бо истинод ба Донишкадаи байналмилалии Левакант хабар медиҳад, ҳамоиш аз намоиши дастовардҳои омӯзгорону донишҷӯён ва кормандон оғоз гардид.

Дар ҳамоиш ректори Донишкадаи байналмилалии Левакант Саидмаҳмуд Саидзода перомуни асолат ва зарурати таҷлили ҷашнҳои миллӣ ва эҳёву таҳкими онҳо аз ҷониби Президенти Тоҷикистон ва муовини ректори Донишгоҳи байналмилалии сайёҳӣ ва соҳибкории Тоҷикистон Исломбек Зоирзода дар иртибот ба моҳият ва шукуҳи таҷлили ҷашни Сада дар замони Истиқлоли давлатӣ ибрози андеша намуданд.

Дар чорабинӣ дар мавзуъҳои «Сада — ҷашни таърихии ниёгони мо», «Пешвои миллат — эҳёгари фарҳанги миллӣ» ва «Сада муждае аз Наврӯз аст» маърӯзаҳои илмӣ пешниҳод гардид.

Маърӯзачиён атрофи ҷанбаҳои таърихӣ, ифтихори миллӣ, гиромидошти арзишҳои таърихиву фарҳангӣ, нақши ҷашнвораҳои миллӣ дар ҳисси худшиносиву худогоҳии ҷавонон ва дигар оинҳои  ҷашни Садаро дар даврони соҳибистиқлолӣ  ибрози андеша  намуданд.

Барномаи рангину дилошуби фарҳангӣ ва адабии ҳайати омӯзгорон ва донишҷӯёни Донишкадаи байналмилалии Левакант пешкаши ҳозирин гардид.

АКС: Донишкадаи байналмилалии Леваканти Донишгоҳи байналмилалии сайёҳӣ ва соҳибкории Тоҷикистон