НИШАСТИ МАТБУОТӢ. Cоли 2025 содироти маҳсулот аз Тоҷикистон беш аз 27 фоиз зиёд гардидааст

ДУШАНБЕ, 09.02.2026 /АМИТ «Ховар»/. Cоли 2025 содироти маҳсулот аз Ҷумҳурии Тоҷикистон 27,7 фоиз зиёд гардидааст. Дар ин хусус директори Агентии омори назди Президенти Ҷумҳурии Тоҷикистон Ҷамшед Нурмаҳмадзода 9 феврал дар ҷараёни нишасти матбуотӣ ба хабарнигорон маълумот дод.

Ба иттилои Ҷамшед Нурмаҳмадзода, соли 2025 содироти маҳсулот аз мамлакат 2 миллиарду 487,9 миллион долларро ташкил намуд, ки нисбат ба моҳҳои январ – декабри соли 2024 27,7 фоиз ё 540,5 миллион доллар зиёд аст.

Таъкид гардид, ки шарикони асосӣ оид ба содирот давлатҳои Чин бо 21,1 фоиз аз ҳаҷми умумии содирот, Нидерланд – 16,3 фоиз, Швейтсария – 13,3 фоиз, Узбекистон – 11,1 фоиз, Русия – 9,7 фоиз, Туркия – 8,6 фоиз, Эрон – 4,5 фоиз, Қазоқистон – 3,4 фоиз, Белгия – 3,3 фоиз ва дигар давлатҳо мебошанд.

Дар нишасти матбуотӣ ҳамчунин таъкид гардид, ки дар амалиёти савдои хориҷӣ афзоиши бештари содирот нисбат ба воридот бо Белгия (70,4 миллион доллар), Туркия (17,3 миллион доллар) ва Хорватия (1,3 миллион доллар) мушоҳида шудааст.

Фирӯза ДАВЛАТЗОДА,
АМИТ «Ховар»

АКС: АМИТ «Ховар»