НИШАСТИ МАТБУОТӢ. Дар Низоми ягонаи гардиши ҳуҷҷатҳои электронӣ беш аз 850 мақомоту ташкилоти давлатӣ фаъоланд

ДУШАНБЕ, 07.02.2026 /АМИТ «Ховар»/. Бо ҷалби барномасозони ватанӣ Низоми ягонаи гардиши ҳуҷҷатҳои электронӣ бо назардошти таҷрибаи кишварҳои минтақа таҳия карда шуда, дар он беш аз 850 мақомоту ташкилоти давлатӣ ва зерсохторҳояшон барои таъмини мубодилаи мукотибот бе истифодаи коғаз фаъол мебошанд. Дар ин хусус имрӯз директори Агентии инноватсия ва технологияҳои рақамии назди Президенти Ҷумҳурии Тоҷикистон Хуршед Мирзо дар нишасти матбуотӣ ба намояндагони расонаҳои хабарӣ иттилоъ дод.

Гуфта шуд, ки дар ин раванд барои тасдиқи аслият ва амнияти мукотибот имзои электронии дар серверҳои дохилӣ сабтшуда дастраси зиёда аз 14 ҳазору 500 истифодабаранда гардид.

Таъкид гардид, ки марҳилаи дуюми татбиқи лоиҳа дар мақомоти иҷроияи ҳокимияти давлатии вилоятҳо ва шаҳру ноҳияҳо оғоз гардида, ин раванд босуръат идома дорад.

Хуршед Мирзо афзуд, ки раванди рақамикунонии соҳаҳои гуногуни иқтисодӣ ва иҷтимоӣ мутобиқ ба ҳадафу афзалияти муайяннамудаи Ҳукумати Ҷумҳурии Тоҷикистон дар доираи тадбирҳои ислоҳотӣ ва бо мақсади таъмини шаффофият, баланд бардоштани самаранокӣ ва беҳбуди сифати хизматрасонии давлатӣ амалӣ мегардад.

Бояд тазаккур дод, ки Агентии инноватсия ва технологияҳои рақамии назди Президенти Ҷумҳурии Тоҷикистон мақоми ваколатдори давлатӣ дар соҳаи инноватсия ва технологияҳои рақамӣ буда, идоракунӣ, татбиқи «Ҳукумати электронӣ», рақамикунонии хизматрасониҳои давлатӣ, ҷорикунӣ ва рушди гардиши ҳуҷҷатҳои электронӣ, истифодаи имзои электронӣ, рушди савдои электронӣ, танзими зеҳни сунъӣ, инчунин такмили равандҳои технологӣ ва дигар масъалаҳои марбут ба самти фаъолиятро таъмин менамояд.

Марзия САИДЗОДА,
АМИТ «Ховар»

АКС: АМИТ «Ховар»