Сафири Тоҷикистон бо Раиси Бошқирдистони Федератсияи Русия мулоқот намуд

ДУШАНБЕ, 25.02.2026 /АМИТ «Ховар»/. 24 феврал Сафири Фавқулода ва Мухтори Ҷумҳурии Тоҷикистон дар Федератсияи Русия Давлатшоҳ Гулмаҳмадзода бо Раиси Ҷумҳурии Бошқирдистони  Федератсияи Русия Радий Хабиров мулоқот намуд. Дар ин хусус мухбири АМИТ «Ховар» бо истинод ба Сафорати Тоҷикистон дар Русия хабар медиҳад.

Зимни мулоқот масъалаҳо оид ба вазъи кунунӣ ва дурнамои густариши ҳамкорӣ байни минтақаҳои Ҷумҳурии Тоҷикистон ва Ҷумҳурии Бошқирдистон дар соҳаҳои иқтисод, савдо, бахши агросаноатӣ, тандурустӣ, маориф, фарҳанг ва сайёҳӣ баррасӣ шуданд.

Ҳамзамон дар вохӯрӣ Давлатшоҳ Гулмаҳмадзода Консули генералии навтаъйини Ҷумҳурии Тоҷикистон дар шаҳри Уфа Фаридун Файзуллозодаро ба таври расмӣ  муаррифӣ намуд.

Дар зимн ҳамсуҳбатон ба густариши ҳамкории сармоягузорӣ дар сатҳи байниминтақавӣ изҳори ҳавасмандӣ намуданд.

АКС: Сафорати Ҷумҳурии Тоҷикистон дар Федератсияи Русия