«БАҲОРИ МАЪРИФАТ: МОДАР, ҚАЛАМ ВА НАВРӮЗ».Таҳти ин унвон дар Душанбе ҳамоиши идона доир шуд

ДУШАНБЕ, 16.03.2026 /АМИТ «Ховар»/. Бо дастгирии Вазорати маориф ва илми Ҷумҳурии Тоҷикистон ва ташаббуси маҷаллаи «Маърифати омӯзгор» ба муносибати ҷашнҳои миллӣ ҳамоиши идона таҳти унвони «Баҳори маърифат: модар, қалам ва Наврӯз» баргузор гардид. Дар ин хусус ба АМИТ «Ховар» аз Маркази матбуоти Вазорати маориф ва илми Ҷумҳурии Тоҷикистон хабар доданд.

Дар ҳамоиш иброз шуд, ки Наврӯз яке аз куҳантарин ҷашнҳои тамаддуни башар буда, рамзи эҳёи табиат, оғози фасли баҳор ва таҷдиди зиндагӣ маҳсуб меёбад. Арзишҳои маънавии Наврӯз инсонро ба некандешӣ, меҳнатдӯстӣ ва созандагӣ ҳидоят намуда, бо ғояҳои илму маърифат ва тарбияи инсон ҳамоҳанг мебошанд.

Иштирокдорон изҳор доштанд, ки давлат ва Ҳукумати Ҷумҳурии Тоҷикистон таҳти роҳбарии Пешвои миллат муҳтарам Эмомалӣ Раҳмон ба рушди соҳаи маориф ва илм таваҷҷуҳи хосса зоҳир намуда, баланд бардоштани сатҳи дониш ва маърифати ҷомеаро яке аз самтҳои афзалиятноки сиёсати давлатӣ медонанд. Дар ин замина, нақши омӯзгорон дар тарбияи насли донишманду ватандӯст ва инчунин, саҳми воситаҳои ахбори омма дар тарғиби таҷрибаи пешқадами омӯзгорӣ ва инъикоси дастовардҳои соҳаи маориф муҳим арзёбӣ гардид.

Зимни ҳамоиш як қатор кормандони соҳаи маориф, аҳли қалам, омӯзгорон ва муаллифони фаъоли маҷаллаи «Маърифати омӯзгор» барои саҳми арзанда дар рушди соҳаи маориф ва ҳамкории судманд бо нашрия бо «Сипоснома» ва туҳфаҳои хотиравӣ қадрдонӣ гардиданд.

АКС: Маркази матбуоти Вазорати маориф ва илми Ҷумҳурии Тоҷикистон