ФУТБОЛ. Наврӯз Воҳидов ва Фаридун Маҳмадиев аз ҳаққи доварӣ маҳрум карда шуданд

ДУШАНБЕ, 12.03.2026 /АМИТ «Ховар»/. Довари марказӣ ва ёвари аввали довари бозии даври якуми Чемпионати Тоҷикистон-2026 оид ба футбол байни дастаҳои «Парвоз» ва «Истаравшан» (2:2) аз ҳакамӣ маҳрум карда шуданд. Дар ин хусус АМИТ «Ховар» бо истинод ба Федератсияи футболи Тоҷикистон хабар медиҳад.

11 март Кумитаи доварони Федератсияи футболи Тоҷикистон ҷаласаи онлайнӣ баргузор кард, ки дар он шикояти дастаи «Истаравшан» оид ба голе, ки дар дақиқаи 90+3-и бозӣ ба муқобили дастаи «Парвоз» ба дарвозаи онҳо зада шуд, баррасӣ гардид.

Пас аз таҳлили наворҳои ин ҳодиса Кумитаи доварони Федератсияи футболи Тоҷикистон ба хулосае омад, ки довари марказӣ Наврӯз Воҳидов дар дақиқаи 90+3 голро иштибоҳан ҳисоб кардааст. Ин хато дар ниҳоят ба ҷараёни бозӣ таъсир расонд ва рақобат бо ҳисоби 2:2 анҷом ёфт.

Бар асоси ин, Кумитаи доварони Федератсияи футболи Тоҷикистон тасмим гирифт, ки довари марказии бозии «Истаравшан» ва «Парвоз» Наврӯз Воҳидовро бо ёвари якумаш  Фаридун Маҳмадиев аз доварии бозиҳои Лигаи олии Тоҷикистон барои се давр маҳрум кунад.

АКС: Федератсияи футболи Тоҷикистон