35-СОЛАГИИ ИСТИҚЛОЛИ ДАВЛАТӢ. Дар шаҳраки Ҳисор бо маблағи зиёда аз 15 миллион сомонӣ кӯдакистон бунёд мегардад

ҲИСОР, 14.04.2026. /АМИТ «Ховар»/. Бахшида ба ҷашни 35-солагии Истиқлолияти давлатии Тоҷикистон дар кӯчаи Султон Раҷабови шаҳраки Ҳисори шаҳри Ҳисор бо маблағи зиёда аз 15 миллион  сомонӣ кӯдакистон бунёд мегардад. Дар ин хусус ба хабарнигори минтақавии АМИТ «Ховар» Субҳониддини Маҳмуд аз Мақомоти иҷроияи ҳокимияти давлатии шаҳри Ҳисор иттилоъ доданд.

Раиси шаҳри Ҳисор Ҷаббор Носирзода зимни шиносоӣ бо  ҷараёни сохтмони кӯдакистон, ки дар доираи Лоиҳаи «Инкишофи барвақтии кӯдакон барои густариши сармояи инсонӣ дар Тоҷикистон» бунёд мегардад, бо коргарон барои вусъат додани корҳо ва бо сифати баланд анҷом додани сохтмон суҳбат кард.

Ҳамчунин  раиси шаҳр бо ҷараёни корҳои таъмиру тармим дар муассисаи томактабии №7 бо номи  «Садбарг» шинос шуда, коргаронро даъват намуд, ки таъмири кӯдакистонро бо сифати баланд ба анҷом расонанд.

Ин кӯдакистонҳо дар арафаи ҷашни 35-солагии Истиқлоли давлатӣ мавриди истифода қарор дода мешаванд.

АКС: Мақомоти иҷроияи ҳокимияти давлатии шаҳри Ҳисор