Дар Донишгоҳи давлатии Бохтар доир ба масъалаҳои таълими забонҳои русӣ ва англисӣ конференсия баргузор гардид

ДУШАНБЕ, 24.04.2026. /АМИТ «Ховар»/. Дар Донишгоҳи давлатии Бохтар ба номи Носири Хусрав таҳти унвони «Масъалаҳои мубрами филология, тарҷума ва методикаи таълими забонҳои русӣ ва англисӣ дар муассисаҳои таълимӣ» конференсияи байналмилалии илмӣ-методӣ доир шуд.

Тавре ба АМИТ «Ховар» аз ин донишгоҳ хабар доданд, ҳамоиш дар доираи татбиқи «Барномаи давлатии такмили таълим ва омӯзиши забонҳои русӣ ва англисӣ дар Ҷумҳурии Тоҷикистон барои давраи то соли 2030» гузаронида шуда, ҳадафи асосии он баррасии масъалаҳои мубрами рушди филология, такмили сифати тарҷума ва ҷорӣ намудани усулҳои муосири таълими забонҳои хориҷӣ мебошад.

Зимни конференсия иштирокчиён оид ба вазъи имрӯзаи омӯзиши забонҳои русӣ ва англисӣ дар муассисаҳои таҳсилоти миёна ва олӣ, мушкилоту роҳҳои ҳалли онҳо, инчунин татбиқи технологияҳои инноватсионӣ дар раванди таълим табодули афкор намуданд.

Гуфта шуд, ки баргузории чунин ҳамоишҳои илмӣ барои таҳкими ҳамкории байналмилалӣ, густариши робитаҳои илмӣ байни донишгоҳҳо ва марказҳои таҳқиқотӣ, инчунин мубодилаи таҷрибаи пешқадам заминаи мусоид фароҳам меорад.

«Дар шароити ҷаҳонишавӣ ва рушди босуръати муносибатҳои иқтисодию фарҳангӣ донистани забонҳои хориҷӣ, бахусус русӣ ва англисӣ, ба яке аз талаботи калидии бозори меҳнат табдил ёфтааст. Аз ин рӯ, баланд бардоштани сатҳи таълими ин забонҳо дар ҳамаи зинаҳои таҳсилот вазифаи муҳим мебошад», — таъкид гардид дар конференсия.

АКС: Донишгоҳи давлатии Бохтар ба номи Носири Хусрав