Дар Душанбе Мусобиқаи байналмилалии гӯштингирӣ барои дарёфти «Ҷоми Раиси шаҳри Душанбе» доир мешавад

ДУШАНБЕ, 02.04.2025 /АМИТ «Ховар»/. 5 апрел бахшида ба Рӯзи пойтахт барои дарёфти «Ҷоми Раиси шаҳри Душанбе» дар Қасри теннис ва маҷмааи варзиши обии шаҳри Душанбе Мусобиқаи ҳафтуми байналмилалӣ оид ба гӯштингирӣ баргузор мешавад.

Дар Мусобиқаи ҳафтуми байналмилалии гӯштингирӣ барои дарёфти «Ҷоми Раиси шаҳри Душанбе» паҳлавонон аз рӯйи вазнҳои то 65кг, 78кг, 86 кг ва +86кг байни мардон ва занон дар вазни то 70 кг бо ҳам рақобат менамоянд.

Дар ин мусобиқа паҳлавонони маъруфи зиёда аз 25 давлати ҷаҳон барои ҷойҳои ифтихорӣ бо ҳам рақобат менамоянд.

Ёдовар мешавам, ки ҷоизаи умумии мусобиқа 100 ҳазор доллари амрикоиро ташкил медиҳад. Ғолибони мақоми аввал соҳиби 10 ҳазор доллар, ҷойи дуюм соҳиби 5 ҳазор доллар ва мақомҳои сеюм соҳиби 2 ҳазору 500 доллари амрикоӣ мегарданд.

Мусобиқа дар асоси қарори Раиси шаҳри Душанбе бо мақсади ташвиқу тарғиб, рушду равнақи варзиш ва таъмини оммавияти варзишу солимгардонии сокинони пойтахт гузаронида мешавад.

Бояд иброз намуд, ки гӯштини миллии тоҷикӣ яке аз варзишҳои маъмул байни мардуми тоҷик ба ҳисоб меравад. Тоҷикон дар замонҳои пеш ин намуди гӯштинро бештар дар тӯю маъракаҳояшон баргузор мекарданд.

Дар гузашта гӯштини миллии тоҷикӣ ҳамчун анъана ба ҷашни Наврӯз шаҳомати дигар мебахшид. Он ягона намуди варзиш ё анъанае буд, ки махсусан мардон ба хотири гӯштин ҷашни Наврӯзро бесаброна интизорӣ мекашиданд. Аз ин бармеояд, ки гӯштин ва Наврӯз бо ҳам алоқамандии ногусастанӣ доранд. Гӯштини миллии тоҷикӣ ё гӯштингирӣ яке аз намудҳои маъмули гӯштин буда, дигар намудҳо, чун ҷудо, самбо, кураш ва камарбандӣ аз он сарчашма мегиранд.

Гӯштингирӣ дар байни аҳолӣ мартабаи баланд дошта, барои оммавӣ гардидани тарбияи ҷисмонӣ воситаи асосӣ ба ҳисоб меравад. Он солҳои охир бо ташаббус ва дастгириҳои Президенти Ҷумҳурии Тоҷикистон муҳтарам Эмомалӣ Раҳмон рушд намудааст.

Меҳрони ҚУРБОН,
шореҳи варзиши АМИТ «Ховар»

АКС: АМИТ «Ховар»