Дар соҳили дарёи Чангоб ҳашари экологии «Тозагии соҳил – 2026» гузаронида шуд

ДУШАНБЕ, 13.04.2026. /АМИТ «Ховар»/. Зимни ҳашари экологии «Тозагии соҳил – 2026», ки дар соҳили дарёи Чангоб гузаронида шуд, 12,4 метри мукааб партов ҷамъоварӣ гардида, тавассути нақлиёти махсус ба партовгоҳи шаҳри Ҳисор интиқол дода шуд. Дар ин хусус АМИТ «Ховар» бо истинод ба Кумитаи ҳифзи муҳити зисти назди Ҳукумати Ҷумҳурии Тоҷикистон иттилоъ медиҳад.

Ҳашари экологии «Тозагии соҳил – 2026» бо ташаббуси Кумитаи ҳифзи муҳити зисти назди Ҳукумати Ҷумҳурии Тоҷикистон гузаронида шуд. Ҳадафи он аз баланд бардоштани маърифати экологии аҳолӣ, ҳифзи муҳити зист ва тоза нигоҳ доштани соҳилҳо иборат буд.

Дар ҳашари экологии «Тозагии соҳил – 2026» роҳбарияти Кумитаи ҳифзи муҳити зисти назди Ҳукумати Ҷумҳурии Тоҷикистон, намояндагони Кумитаи иҷроияи Ҳизби Халқии Демократии Тоҷикистон дар шаҳри Ҳисор, кормандони мақомоти ҳифзи муҳити зист, Корхонаи манзилию коммуналӣ, аъзои фаъоли ташкилоти «Созандагони Ватан» ва волонтёрони бахши кор бо ҷавонон ва варзиши шаҳри Ҳисор иштирок намуданд.

Ташкили чунин ҳашарҳо барои беҳдошти вазъи экологӣ, пешгирии ифлосшавии муҳити зист ва ҷалби аҳолӣ ба корҳои ҷамъиятӣ муҳим арзёбӣ мегардад.

АКС: Кумитаи ҳифзи муҳити зисти назди Ҳукумати Ҷумҳурии Тоҷикистон