Доир ба иҷрои барномаҳои давлатии соҳаи маориф дар ноҳияи Рашт ҷаласа баргузор гардид

ДУШАНБЕ, 21.04.2026. /АМИТ «Ховар»/. Дар ноҳияи Рашт таҳти раёсати муовини Сарвазири Ҷумҳурии Тоҷикистон Дилрабо Мансурӣ доир ба иҷрои барномаҳои давлатии соҳаи маориф ҷаласа баргузор гардид, хабар медиҳад АМИТ «Ховар».

Ҷаласа бо ҳадафи таҳлили раванди иҷрои барномаҳои давлатии марбут ба соҳаи маориф, аз ҷумла «Барномаи таъмини муассисаҳои таълимӣ бо кабинетҳои фаннӣ ва озмоишгоҳҳои муҷаҳҳази таълимӣ барои солҳои 2021–2025», «Барномаи давлатии рушди таҳсилоти томактабӣ барои солҳои 2020–2035», «Барномаи рақамикунонии муассисаҳои таълимӣ», ки дар заминаи сиёсати маорифпарваронаи Ҳукумати Ҷумҳурии Тоҷикистон ва дастгирии Пешвои миллат муҳтарам Эмомалӣ Раҳмон қабул гардидаанд, доир шуд.

Муовини Вазири маориф ва илми Ҷумҳурии Тоҷикистон Равшан Каримзода зимни баррасии масъалаҳо иброз намуд, ки бо мақсади баланд бардоштани сатҳу сифати таълим ва тақвияти имконияти муассисаҳои таълимӣ якчанд тадбир, аз ҷумла бунёди муассисаҳои нави таълимӣ, таъмиру таҷдиди синфхонаҳо, таъмини онҳо бо мизу курсӣ, ҷалби омӯзгорони соҳибихтисос (махсусан дар фанҳои дақиқ ва технологияи иттилоотӣ), ташкили даврҳои такмили ихтисосу семинарҳои омӯзишӣ, баргузории озмуну олимпиадаҳо, таъмини муассисаҳо бо компютер ва интернет, инчунин тавсеаи соҳаи таҳсилоти томактабӣ амалӣ карда мешаванд.

Муовини Сарвазири Тоҷикистон изҳор дошт, ки дар робита ба омодагии хонандагон ба озмуну олимпиадаҳои ҷумҳуриявӣ, аз ҷумла «Тоҷикистон — Ватани азизи ман», «Фурӯғи субҳи доноӣ китоб аст», «Илм — фурӯғи маърифат», «Шоҳномахонӣ» тадбирҳои ҷиддӣ ба роҳ монда шуда, дар ин самт натиҷаҳо бояд боз ҳам хубтар гарданд.

Дар асоси шумораи аҳолии шаҳру ноҳияҳо сохтмони муассисаҳои нави томактабӣ оғоз ёфта, ин раванд дар ҳамкорӣ бо шахсони саховатманд ва соҳибкорон суръат бахшида шавад. Шумораи марказҳои инкишофи кӯдак зиёд гардида, фарогирии бештари кӯдакон дар онҳо таъмин карда шавад. Ҳамзамон бо бунёди муассисаҳои томактабӣ масъалаи таъмини онҳо бо мутахассисон ва ҷалби кадрҳои ҷавон мавриди таваҷҷуҳ қарор гирад. Дар самти таъмини муассисаҳо бо кабинетҳои фаннӣ, таҷҳизоти озмоишӣ, компютер ва пайвастшавӣ ба интернет тадбирҳои амалӣ андешида шаванд.

Дар анҷоми ҷаласа муовини Сарвазири Тоҷикистон таъкид намуд, ки натиҷаҳои татбиқи барномаҳо ва озмунҳо ҷамъбаст гардида, барои баррасӣ ба Ҳукумати Ҷумҳурии Тоҷикистон пешниҳод карда шаванд.

АКС: АМИТ «Ховар»