Пагоҳ дар Душанбе Форуми байналмилалии «Ҳамкорӣ ба хотири рушди устувор: Сабз. Рақамӣ. Ҳушманд» оғоз меёбад

ДУШАНБЕ, 13.04.2026. /АМИТ «Ховар»/. Пагоҳ дар Душанбе Форуми байналмилалии «Ҳамкорӣ ба хотири рушди устувор: Сабз. Рақамӣ. Ҳушманд» оғоз меёбад, иттилоъ медиҳад АМИТ «Ховар» бо истинод ба Донишгоҳи байналмилалии сайёҳӣ ва соҳибкории Тоҷикистон.

Дар робита ба ин барои иштирок дар Форуми байналмилалии «Ҳамкорӣ ба хотири рушди устувор. Сабз. Рақамӣ. Ҳушманд» ректорони муассисаҳои таҳсилоти олии касбии Русия, Туркия, Латвия, Лаҳистон, Индонезия ва Покистон ба Душанбе омадаанд.

Меҳмононро роҳбарияту намояндагони Донишгоҳи байналмилалии сайёҳӣ ва соҳибкории Тоҷикистон истиқбол гирифта, ба онҳо оид ба барномаи форум, ҷараёни баргузории чорабиниҳо ва имконияти ҳамкории минбаъдаи илмӣ-таҳқиқотӣ ва таълимӣ маълумоти муфассал пешниҳод гардид. Гуфта шуд, ки иштироки ректорони донишгоҳҳои бонуфузи давлатҳои хориҷӣ дар Форуми байналмилалӣ барои густариши ҳамкории байналмилалӣ, табодули таҷриба ва рушди робитаҳои илмӣ-академӣ заминаи мусоид фароҳам меорад.

Форум бо ибтикори Донишгоҳи байналмилалии сайёҳӣ ва соҳибкории Тоҷикистон дар мувофиқа бо Ҳукумати Ҷумҳурии Тоҷикистон гузаронида шуда, платформаи бисёрзинагии байналмилалие мебошад, ки ниҳодҳои давлатӣ, ҷомеаи илмӣ ва академӣ, бахши хусусӣ, созмонҳои байналмилалӣ ва ҷавононро бо мақсади баррасии рӯзномаи рушди устувор, иқтисоди «сабз», гузариши рақамӣ, зеҳни сунъӣ, инноватсияҳо ва қарорҳои «ҳушманд» муттаҳид месозад.

Дар доираи форум саммити ректорон, конфронсҳои байналмилалии илмию амалӣ дар самтҳои гуногун, форуми экологии ҷавонон, форуми соҳибкорӣ, намоишгоҳҳои лоиҳаҳои илмӣ ва инноватсионӣ, ташаббусҳои стартапӣ, олимпиадаю озмунҳо, чорабиниҳои фарҳангӣ-экологӣ, инчунин дигар чорабиниҳои канорӣ гузаронида мешаванд.

Дар барномаи форум таваҷҷуҳи махсус ба чорабиниҳое бахшида мешавад, ки ба ташаббусҳои байналмилалии Ҷумҳурии Тоҷикистон дар соҳаи рушди устувор, иқтисоди «сабз», зеҳни сунъӣ, идоракунии захираҳои об ва ҳифзи муҳити зист равона гардида, дар сатҳи ҷаҳонӣ эътироф шудаанд.

Марзия САИДЗОДА,
АМИТ «Ховар»

АКС: Донишгоҳи байналмилалии сайёҳӣ ва соҳибкории Тоҷикистон