Дар Душанбе Рӯзҳои шаҳри Санкт-Петербург доир мегарданд

ДУШАНБЕ, 19.05.2026 /АМИТ «Ховар»/. 20–23 май дар пойтахти мамлакат Рӯзҳои Санкт–Петербург баргузор мегарданд, ки ба 35–солагии истиқрори робитаҳои бародаршаҳрӣ байни шаҳрҳои Душанбе ва Санкт–Петербург бахшида мешавад.  Дар ин хусус ба АМИТ «Ховар» аз Мақомоти иҷроияи ҳокимияти давлатии шаҳри Душанбе хабар доданд.

Дар доираи Рӯзҳои шаҳри Санкт–Петербург баргузории вохӯриҳо бо роҳбарияти шаҳри Душанбе ва дигар вазорату идораҳои ҷумҳурӣ, нишастҳои тиҷоратию корӣ, намоишгоҳи аксҳо, барномаи фарҳангӣ, доир намудани амалиёти муштараки тиббӣ, табодули таҷрибаи маорифчиён, ҷавонон, сохторҳои сайёҳӣ ва шиносоӣ аз маконҳои сайёҳию таърихии Тоҷикистон дар назар дошта шудааст.

Бояд гуфт, ки Рӯзҳои шаҳри Санкт-Петербург дар Душанбе дар таҳкиму густариши муносибатҳои бародаршаҳрӣ ва ҳамкории гуногунҷанба байни Душанбе ва Санкт- Петербург саҳифаҳои нав боз намуда,  барои   дарёфти  самту усулҳои тоза ва муайян кардани уфуқҳои нави ҳамкорӣ  заминаи мусоид фароҳам меоранд.

Ёдовар мешавем, ки  байни  шаҳри Санкт-Петербург ва  шаҳри Душанбе соли 1991 паймони бародаршаҳрӣ  баста шудааст.

Шаҳри Санкт–Петербурги Федератсияи Русия яке аз бародаршаҳрҳои фаъол байни дигар бародаршаҳрҳои Душанбе мебошад, ки сол то сол ҳамкории мутақобили судманди онҳо густариш меёбад.

Дар ин давра байни Мақомоти иҷроияи ҳокимияти давлатии шаҳри Душанбе ва шаҳрдории Санкт-Петербург дар бораи ҳамкории тиҷоратӣ-иқтисодӣ, илмӣ-техникӣ ва фарҳангӣ созишномаҳо ба имзо расиданд.

АКС: АМИТ «Ховар»