Ҷаласаи Шурои Маҷлиси миллии Маҷлиси Олии Ҷумҳурии Тоҷикистон, даъвати ҳафтум баргузор шуд

ДУШАНБЕ, 16.06.2026 /АМИТ «Ховар»/. Имрӯз дар шаҳри Душанбе таҳти раёсати Раиси Маҷлиси миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ ҷаласаи навбатии Шурои Маҷлиси миллии Маҷлиси Олии Ҷумҳурии Тоҷикистон, даъвати ҳафтум баргузор шуд. Дар ин хусус ба АМИТ «Ховар» аз Маҷлиси миллии Маҷлиси Олии Ҷумҳурии Тоҷикистон хабар доданд.

Тибқи рӯзнома дар ҷаласа 47 масъала баррасӣ гардид. Аъзои Шурои Маҷлиси миллӣ бо тартиби муқарраргардида Қонуни конститутсионии Ҷумҳурии Тоҷикистон «Оид ба ворид намудани тағйиру иловаҳо ба Қонуни конститутсионии Ҷумҳурии Тоҷикистон «Дар бораи судҳои Ҷумҳурии Тоҷикистон», Қонуни конститутсионии Ҷумҳурии Тоҷикистон «Оид ба ворид намудани тағйир ба Қонуни конститутсионии Ҷумҳурии Тоҷикистон «Дар бораи Ҳукумати Ҷумҳурии Тоҷикистон», қонунҳои Ҷумҳурии Тоҷикистон «Дар бораи таҳсилоти ибтидоии касбӣ», «Дар бораи таъмини ҳуқуқ ва ҳифзи иҷтимоии шахсони маъюбиятдошта», ки дар шакли мукаммал қабул гардидаанд, ҳамчунин як қатор қонунҳои Ҷумҳурии Тоҷикистонро дар бораи ворид намудани тағйиру иловаҳо ба кодексҳои ҷиноятӣ, мурофиавии ҷиноятӣ, меҳнат, тандурустӣ ва андози Ҷумҳурии Тоҷикистон мавриди баррасӣ қарор доданд.

Дар идомаи ҷаласа аъзои Шуро инчунин 30 қонуни дигарро вобаста ба ворид намудани тағйиру иловаҳо ба қонунҳои Ҷумҳурии Тоҷикистон муҳокима карданд.

Тибқи рӯзнома, якчанд масъала оид ба пешниҳодҳои Президенти Ҷумҳурии Тоҷикистон дар бораи қатъ намудани ваколат ва интихоб намудани судяҳои Суди конститутсионӣ, бозхонд намудани судяи Суди Олӣ, бозхонд ва интихоб намудани судяҳои Суди Олии иқтисодӣ мавриди баррасии аъзои Шуро қарор гирифтанд.

АКС: Маҷлиси миллии Маҷлиси Олии Ҷумҳурии Тоҷикистон