Дар мавзуи «Дипломатияи парлумонии Ҷумҳурии Тоҷикистон – назария ва амалияи он» ҳамоиш баргузор гардид

ДУШАНБЕ, 09.06.2026 /АМИТ «Ховар»/. Имрӯз дар Маҷлиси намояндагони Маҷлиси Олии Ҷумҳурии Тоҷикистон таҳти унвони «Дипломатияи парлумонии Ҷумҳурии Тоҷикистон – назария ва амалияи он» ҳамоиш баргузор гардид. Дар ин хусус ба АМИТ «Ховар» аз Маҷлиси намояндагон хабар доданд.

Чорабинӣ бо ибтикори Кумита оид ба корҳои байналмилалӣ, иттиҳодияҳои ҷамъиятӣ ва иттилоот баргузор шуда, дар кори он вакилони Маҷлиси намояндагони Маҷлиси Олии Ҷумҳурии Тоҷикистон, намояндагони фраксияҳои ҳизбҳои сиёсӣ, масъулини дастгоҳи Маҷлиси намояндагон ва намояндагони воситаҳои ахбори омма иштирок намуданд. Зимни ифтитоҳи чорабинӣ раиси Кумита оид ба корҳои байналмилалӣ, иттиҳодияҳои ҷамъиятӣ ва иттилоот Маҳмадшоҳ Гулзода иброз намуд, ки дипломатияи парлумонӣ дар шароити муосир ба яке аз воситаҳои муҳими таҳкими муколамаи байналмилалӣ, эътимоди сиёсӣ ва ҳифзи манфиатҳои миллӣ табдил ёфта, дар рушди ҳамкории байнидавлатӣ нақши афзоянда мебозад. Ҷумҳурии Тоҷикистон бо такя ба Конститутсия, Консепсияи сиёсати хориҷӣ ва сиёсати сулҳҷӯёнаи худ ба густариши робитаҳои байнипарлумонӣ таваҷҷуҳи хос зоҳир менамояд.

Дар ин замина, нақши Пешвои миллат муҳтарам Эмомалӣ Раҳмон дар таҳкими асосҳои устувори сиёсати хориҷии Ҷумҳурии Тоҷикистон, ташаккули мавқеи байналмилалии мамлакат ва пешбурди ташаббусҳои глобалии сулҳҷӯёна махсус таъкид гардид.

Изҳор шуд, ки маҳз сиёсати дурбинона ва стратегияи пайгиронаи Сарвари давлат заминаи мусоиди рушди дипломатияи муосир, аз ҷумла дипломатияи парлумониро фароҳам овардааст.

Дар ҷараёни ҳамоиш масъалаҳои рушди робитаҳои байнипарлумонӣ дар доираи созмонҳои байналмилалӣ, саҳми парлумон дар таҳкими суботи минтақавӣ, дипломатияи экологӣ дар заминаи тағйирёбии иқлим, пешбурди ташаббусҳои ҷаҳонии Тоҷикистон дар соҳаи обу иқлим ва истифодаи дипломатияи парлумонӣ ҳамчун воситаи «неруи нарм» мавриди баррасӣ қарор гирифтанд.

Иброз гардид, ки ташаббусҳои байналмилалии Ҷумҳурии Тоҷикистон, аз ҷумла дар доираи Даҳсолаи байналмилалии амал «Об барои рушди устувор, солҳои 2018–2028» ва масъалаи ҳифзи пиряхҳо, бояд дар сатҳи созмонҳои байналмилалии байнипарлумонӣ фаъолона муаррифӣ гарданд.

Инчунин иштирокчиён оид ба таҳкими ҳамкории байнипарлумонӣ, густариши гурӯҳҳои дӯстӣ ва рушди дипломатияи рақамӣ ибрози ақида намуданд.

АКС: Маҷлиси намояндагони Маҷлиси Олии Ҷумҳурии Тоҷикистон