МАСЛИҲАТИ МУТАХАССИС. Истеъмоли бодиринг барои танзими фишори хун дар организм кумак мерасонад

ДУШАНБЕ, 07.06.2026 /АМИТ «Ховар»/. Бодиринг яке аз сабзавоти маъмул дар Тоҷикистон буда, истеъмоли он ба бисёр бемориҳо фоида дорад. Бодирингро ҳам барои саломатӣ ва ҳам барои зебоӣ истифода мебаранд. Таркиби бодиринг аз 90-95 фоиз об, витаминҳои С, К, В, минералҳои калий, магний ва нахи ғизоӣ (барои рӯдаҳо) иборат аст.

Илова кардани бодиринг ба ғизои ҳаррӯза метавонад на танҳо организмро солим нигоҳ дорад, балки ба саломатии дил, пӯст ва гурдаҳо низ таъсири мусбат расонад. Аз сабабе, ки дар таркиби бодиринг калий мавҷуд аст, он барои танзими фишори хун дар организм кумак мерасонад. Бодиринг таъсири натрийро кам карда, ба беҳтар  намудани кори дил мусоидат мекунад.

Ҳамчунин бодиринг дорои нахи табиӣ мебошад, ки барои беҳтар кардани ҳозима ва пешгирии қабзият кумак мерасонад. Он барои хориҷ кардани токсинҳо аз организм, беҳтар шудани кори гурдаҳо ва пешгирии сангҳои гурда низ ёрӣ мерасонад.

Мутахассисони соҳаи тиб барои шахсоне, ки мехоҳанд вазни зиёдатии худро кам намоянд, истеъмоли зиёди бодирингро тавсия медиҳанд.  Зеро он ба зуд пур кардани шикам мусоидат намуда, эҳсоси гуруснагиро кам менамояд.

Бодиринг барои нигоҳубини пӯст низ хеле фоиданок аст. Онро ҳамчун ниқоб барои тароват бахшидан ва сабук кардани пӯст истифода мебаранд. Он равғанҳои қабати болоии пӯстро тоза мекунад.

Бодирингро дар шакли хӯриш, шарбат ва ҳамчун ғизои алоҳида истеъмол кардан мумкин аст. Баъди истеъмоли бодиринг нӯшидани оби хунук ё газдор, лимонад ва шир ҷоиз нест.

Ба тавсияи табибон тухми бодиринги кӯфта барои гардонидани варам кумак мекунад. Ҳар рӯз чор грамм тухми бодирингро кӯфта бихӯранд, захми шушро низ шифо мебахшад. Бодирингро пора карда, ба пешонӣ ва сар гузошта банданд, дарди сареро, ки сабаби он истеъмоли моддаҳои гарм бошад, рафъ мекунад.

Таҳияи Зарангези ЛАТИФ,

АКС аз манбаъҳои боз