Масоили рушди низоми нақлиёти шаҳри Душанбе бо БАТР баррасӣ гардид

ДУШАНБЕ, 15.06.2026 /АМИТ «Ховар»/. Имрӯз муовини Раиси шаҳри Душанбе Раҳмиддин Саломзода бо ҳайати Бонки аврупоии таҷдид ва рушд вохӯрӣ намуд. Дар ин хусус АМИТ «Ховар» бо истинод ба шуъбаи иттилоотии дастгоҳи Раиси шаҳри Душанбе хабар медиҳад.

Дар вохӯрӣ ҷонибҳо масъалаҳои марбут ба рушди низоми нақлиёти шаҳри Душанбе, густариши ҳамкорӣ байни Мақомоти иҷроияи ҳокимияти давлатии шаҳри Душанбе ва Бонки аврупоии таҷдид ва рушдро мавриди баррасӣ қарор доданд.

Зимни вохӯрӣ мусоҳибон масъалаҳои татбиқи лоиҳаҳои инфрасохтории роҳу нақлиёт, ворид намудани барномаҳои муосири рақамӣ барои моделсозии системаҳои нақлиётӣ, идоракунии ҳаракати нақлиёт ва коҳиш додани тамбашавии роҳҳо, инчунин истифодаи таҷрибаи пешқадами байналмилалӣ дар самти баланд бардоштани самаранокии низоми нақлиёти шаҳриро матраҳ намуданд.

Мусоҳибон барои таҳкими ҳамкории мутақобилан судманд ва татбиқи лоиҳаҳои муштарак дар самти рушди инфрасохтори нақлиётӣ, инчунин боз ҳам беҳтар намудани шароити ҳаракат дар шаҳри Душанбе омодагии худро баён доштанд.

АКС: шуъбаи иттилоотии дастгоҳи Раиси шаҳри Душанбе