Варзишгари Тоҷикистон дар мусобиқаи байналмилалии теннис соҳиби ду медали тилло шуд

ДУШАНБЕ, 27.07.2026 /АМИТ «Ховар»/. Варзишгари Ҷумҳурии Тоҷикистон Сомон Амонов дар мусобиқаи байналмилалии рейтингии Федератсияи байналмилалии теннис Andijan Cup ITF J30 соҳиби ду медали тилло гардид. Мусобиқаи байналмилалии рейтингии Федератсияи байналмилалии теннис Andijan Cup ITF J30 дар шаҳри Андиҷони Ҷумҳурии Узбекистон баргузор гардид.

Тавре ба АМИТ «Ховар» аз Кумитаи кор бо ҷавонон ва варзиши назди Ҳукумати Ҷумҳурии Тоҷикистон иттилоъ доданд, Сомон Амонов дар рақобатҳои инфиродӣ бо гузаштан аз марҳилаҳои мусобиқа ба даври финалӣ роҳ ёфта, варзишгари Ҷумҳурии Узбекистон Никита Ғафуровро бо ҳисоби 4:6, 7:6(3) ва 6:3 шикаст дода, ба гирифтани медали тилло ва ҷойи якум мушарраф гардид.

Варзишгари тоҷик инчунин дар сабқати ҷуфтӣ дар якҷоягӣ бо намояндаи Ҷумҳурии Узбекистон Никита Ғафуров дар бозии финалӣ бар варзишгарони Ҷумҳурии Қазоқистон Диас Тулепбергенов ва Ҳақназар Жеткербай бо ҳисоби 6:7(6), 7:5, 10:7 пирӯз шуда, дар ин мусобиқа медали дуюми тиллоро соҳиб шуд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон