ВАРЗИШ — ПАЙКИ СУЛҲ, ДӮСТӢ ВА СОЗАНДАГӢ. Ҳамоиши фарҳангию фароғатӣ ва варзишию солимгардонӣ доир шуд

ДУШАНБЕ, 11.08.2026 /АМИТ «Ховар»/. Бо ташаббуси Кумитаи кор бо ҷавонон ва варзиши назди Ҳукумати Ҷумҳурии Тоҷикистон бахшида ба Рӯзи варзишгарони Тоҷикистон таҳти унвони «Варзиш – пайки сулҳ, дӯстӣ ва созандагӣ» ҳамоиши тантанавии фарҳангию фароғатӣ ва варзишию солимгардонӣ баргузор гардид. Дар ин хусус ба АМИТ «Ховар» аз Кумитаи кор бо ҷавонон ва варзиш хабар доданд.

Иброз гардид, ки бо дастгирии пайвастаи Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон барои рушди соҳаи тарбияи ҷисмонӣ ва варзиш, тарғиби тарзи ҳаёти солим, оммавигардонии варзиш ва фароҳам овардани шароити мусоид барои ҷавонон тадбирҳои муассир амалӣ гардида, варзиш ба омили муҳими таҳкими саломатии ҷомеа, ваҳдат, дӯстӣ ва муаррифии шоистаи Тоҷикистон дар арсаи байналмилалӣ табдил ёфтааст.

Ҳамзамон як зумра собиқадорони соҳаи тарбияи ҷисмонӣ ва варзиш, мураббиёни соҳибтаҷриба, варзишгарони номдор, ғолибону ҷоизадорони мусобиқаҳои ҷумҳуриявӣ ва байналмилалӣ барои саҳми арзанда дар рушди соҳа ва тарғиби тарзи ҳаёти солим бо дипломҳо, сипосномаҳо ва туҳфаҳои хотиравии Кумитаи кор бо ҷавонон ва варзиши назди Ҳукумати Ҷумҳурии Тоҷикистон қадрдонӣ гардиданд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон