Бахшида ба 115–солагии Нависандаи халқии Тоҷикистон Сотим Улуғзода конференсияи ҷумҳуриявӣ доир гардид

ДУШАНБЕ, 19.09.2026 /АМИТ «Ховар»/. 18 сентябр дар Академияи миллии илмҳои Тоҷикистон ба муносибати 115 — солагии Нависандаи халқии Тоҷикистон Сотим Улуғзода таҳти унвони «Сотим Улуғзода ва тасвиру инъикоси арзишҳои бадеию таърихӣ ва худшиносию худогоҳии миллӣ дар адабиёти муосири тоҷик» конференсияи ҷумҳуриявии илмию назариявӣ баргузор гардид, хабар медиҳад АМИТ «Ховар» бо истинод ба академия.

Дар конференсия президенти Академияи миллии илмҳо Қобилҷон Хушвахтзода, раиси Иттифоқи нависандагони Тоҷикистон Низом Қосим, ректори Донишгоҳи байналмилалии забонҳои хориҷии ба номи Сотим Улуғзода Жило Гулназарзода ва олимони академия оид ба паҳлуҳои гуногуни ҳаёт ва фаъолияти адабии Сотим Улуғзода ва нақши ӯ дар рушди адабиёти муосири тоҷик сухан намуданд.

Иброз гардид, ки устод Сотим Улуғзода яке аз нависандагони бузурги миллии мост. Ӯ аз ҷумлаи адибоне мебошад, ки бо осори мондагори худ дар рушди адабиёти муосири тоҷик ва таҳкими худшиносии миллии мардум саҳми бузург гузоштааст.

Сотим Улуғзода дар асарҳои баландмазмунаш «Қисмати шоир», «Субҳи ҷавонии мо», «Фирдавсӣ», «Восеъ», «Ривояти суғдӣ», «Алломаи Адҳам» ва ғайра симои шахсиятҳои таърихӣ ва қаҳрамонию ҷонфишонии мардуми тоҷикро давоми асрҳо таҷассум намуда, дар ташаккули худшиносии миллӣ ва ҳисси ватандӯстии чандин насли халқамон саҳми арзанда гузоштааст.

Таъкид гардид, ки осори таърихии Сотим Улуғзода барои наслҳои имрӯз ва оянда ҳамчун сарчашмаи муҳими омӯзиши таърих ва адабиёти миллӣ аҳаммияти хосса дошта, тавассути онҳо хонанда бо чеҳраҳои бузурги миллат, муборизаҳои таърихӣ ва арзишҳои маънавию фарҳангии гузашта шинос мегардад. Аз ин рӯ, омӯзиш ва таҳқиқи мероси адабии нависанда дар шароити имрӯза низ муҳим буда, ба рушди тафаккури миллӣ ва эҳтиром ба таъриху фарҳанги ниёгон мусоидат менамояд.

АКС: Академияи миллии илмҳои Тоҷикистон