Дар Тошканд чорабинии тантанавӣ бахшида ба 35-солагии Истиқлоли Тоҷикистон баргузор шуд

ДУШАНБЕ, 18.09.2026 /АМИТ «Ховар»/. Дар Сафорати Ҷумҳурии Тоҷикистон дар Узбекистон чорабинии тантанавӣ бахшида ба 35-солагии Истиқлоли давлатии Тоҷикистон баргузор шуд.

Тавре ба АМИТ «Ховар» аз Сафорати Тоҷикистон дар Узбекистан хабар доданд, дар чорабинӣ муовини Сарвазир — вазири иқтисод ва молияи Ҷумҳурии Узбекистон Ҷамшид Кучкаров, намояндагони Вазорати корҳои хориҷӣ, ниҳодҳои давлатӣ, доираҳои ҷамъиятӣ, илмӣ ва тиҷоратии Узбекистон, корпуси дипломатӣ ва ҳамватанони муқими Узбекистон иштирок карданд.

Сафири Фавқулода ва Мухтори Ҷумҳурии Тоҷикистон дар Ҷумҳурии Узбекистон Исматулло Насредин аҳамияти таърихии истиқлолиятро  дар таҳкими давлатдорӣ, ваҳдати миллӣ ва рушди устувори мамлакат ва дастовардҳои назарраси иҷтимоию иқтисодии давлат таъкид намуд.

Зимни суханронӣ ба рушди муносибатҳои Тоҷикистону Узбекистон таваҷҷуҳи махсус зоҳир гардид. Роҳбари намояндагии дипломатии Тоҷикистон таъкид кард, ки робитаҳои чандинсолаи дӯстӣ ва ҳамҷаворӣ байни ду мамлакат имрӯз мазмуни нав касб намуда, доираи васеи соҳаҳои ҳамкориро фаро мегирад.

Таваҷҷуҳи хосса ба ташаббусҳои байналмилалии Тоҷикистон дар соҳаҳои дипломатияи об ва иқлим, рушди устувор, фарҳанг ва ҳифзи мероси таърихӣ зоҳир карда шуд.

Дар ин замина аҳамияти рамзии таҷлили байналмилалии 1050-солагии шоири барҷастаи тоҷику форс Робиаи Балхӣ, ки ба Феҳристи санаҳои муҳими ЮНЕСКО дохил шудааст, инчунин қабули Қатънома дар бораи Устувонаи Куруши Кабир ва таблиғи идеяҳои инсондӯстонаи ӯ таъкид карда шуд.

Дар қисми фарҳангии ҳамоиш ҳунармандони шинохта аз Тоҷикистон бо барномаи пурра ва рангин меҳмононро бо ғановати санъати мусиқии миллии тоҷикӣ шинос намуданд. Ҳамчунин дар доираи чорабинӣ намоиши либосҳои миллӣ баргузор гардид, ки зебоии либоси миллӣ ва фарҳанги волои тоҷиконаро ба намоиш гузошт. Ин шоми тантанавӣ бо пешниҳоди мизи бошукуҳи идона ва нозу неъматҳои миллӣ таассуроти меҳмононро боз ҳам амиқтар кард.

АКС: Сафорати Ҷумҳурии Тоҷикистон дар Ҷумҳурии Узбекистон