Бахшида ба Рӯзи забони давлатии Тоҷикистон дар ноҳияи Ёвон ҳамоиши тантанавӣ баргузор гардид

ДУШАНБЕ, 05.10.2026 /АМИТ «Ховар»/. Бахшида ба Рӯзи забони давлатии Ҷумҳурии Тоҷикистон дар ноҳияи Ёвон чорабинии тантанавӣ баргузор гардид. Дар ин хусус ба АМИТ «Ховар» аз Мақомоти иҷроияи ҳокимияти давлатии ноҳияи Ёвон хабар доданд.

Дар ҳамоиш Раиси ноҳияи Ёвон Икромиддин Вализода забони давлатиро ҳамчун рукни муҳими давлатдории миллӣ, омили таҳкими худшиносӣ ва худогоҳии миллӣ ва пайванди ногусастании наслҳо арзёбӣ намуд. «Забони тоҷикӣ давоми таърихи пурифтихори миллати тоҷик на танҳо воситаи муошират, балки хотираи таърихӣ, шиносномаи маънавӣ ва яке аз пояҳои ҳастии миллӣ маҳсуб мешавад. Ин забони куҳанбунёд бо осори безаволи Рӯдакию Фирдавсӣ, Саъдию Ҳофиз, Мавлоно Ҷалолиддини Балхию Камоли Хуҷандӣ ва садҳо суханвару донишманди дигар ганҷинаи бузурги маънавии башариятро ғанӣ гардонидааст», -афзуд Икромиддин Вализода.

Дар даврони соҳибистиқлолии Ҷумҳурии Тоҷикистон бо сиёсати фарҳангпарварона ва таваҷҷуҳи пайвастаи Президенти Ҷумҳурии Тоҷикистон муҳтарам Эмомалӣ Раҳмон ҳифз, рушд ва мақоми давлатӣ гирифтани забони тоҷикӣ ба яке аз самтҳои муҳими сиёсати давлатӣ дар соҳаи фарҳанг ва худшиносии миллӣ табдил ёфт.
Дар ин замина, арҷгузорӣ ба забони давлатӣ танҳо таҷлили як санаи тақвимӣ набуда, балки ифодаи эҳтиром ба таърих, фарҳанг, давлатдорӣ ва арзишҳои миллӣ мебошад. Аз ин рӯ, ҳар шаҳрванди кишвар вазифадор аст, ки барои покизагии забон, риояи меъёрҳои забони адабӣ, густариши доираи истифодаи он ва ба наслҳои оянда ба таври шоиста интиқол додани ин мероси муқаддаси миллӣ саҳми муносиб гузорад.

Таъкид шуд, ки дар шароити ҷаҳонишавӣ ҳифзи забони давлатӣ ва боло бурдани фарҳанги истифодаи он яке аз вазифаҳои муҳими ҷомеаи муосир буда, қудрати забон ба устувории давлат, ваҳдати миллӣ ва ҳувияти миллии ҷомеа иртиботи мустақим дорад.

АКС: Мақомоти иҷроияи ҳокимияти давлатии ноҳияи Ёвон