Дар 10 моҳи соли 2026 беш аз 9 ҳазор шаҳрванди Тоҷикистон дар Русия бо ҷойи кор таъмин гардиданд

ДУШАНБЕ, 30.10.2026 /АМИТ «Ховар»/. Дар 10 моҳи соли 2026 бо мусоидати Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Русия оид ба муҳоҷират 9 ҳазору 52 нафар шаҳрвандони Тоҷикистон дар ҳудуди ин давлат бо ҷойи кори доимӣ таъмин гардиданд. Дар ин хусус ба АМИТ «Ховар» аз ин намояндагӣ хабар доданд.

Инчунин дар ин давра 32 миллиону 523 ҳазору 239 рубл маблағи музди меҳнати пардохтнашудаи муҳоҷирони меҳнатӣ баргардонида шуд.

Самтҳои афзалиятноки фаъолияти намояндагӣ  мусоидат намудан ба бо ҷойи кор таъмин намудани шаҳрвандон, фароҳам овардани шароити арзандаи меҳнат, таъмини кафолатҳои иҷтимоӣ ва ҳифзи ҳуқуқу манфиатҳои қонунии муҳоҷирони меҳнатӣ мебошад.

Дар ин замина масъулин бо намояндагони корхонаю ташкилот ва сохторҳои дахлдори Федератсияи Русия вохӯриҳои корӣ баргузор намуда, масъалаҳои ҷалби қувваи корӣ, муайян намудани ҷойҳои холии корӣ, мутобиқати тахассуси шаҳрвандон ба талаботи бозори меҳнат, таъмини музди меҳнати муносиб ва пардохти саривақтии он, инчунин риояи қоидаҳои бехатарии меҳнатро баррасӣ менамоянд.

Намояндагӣ ба шаҳрвандони Тоҷикистон тавсия медиҳад, ки ҳангоми фаъолияти меҳнатӣ дар хориҷи мамлакат шартномаи расмии меҳнатӣ баста, талаботи қонунгузории муҳоҷиратро риоя намоянд ва аз ҳуқуқу уҳдадориҳои худ огоҳ бошанд. Зеро фаъолияти меҳнатии қонунӣ яке аз омилҳои муҳими ҳифзи ҳуқуқу манфиатҳо ва таъмини суботи иҷтимоии муҳоҷирони меҳнатӣ ба ҳисоб меравад.

АКС: Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Русия оид ба муҳоҷират