Дар Донишгоҳи давлатии Кӯлоб бахшида ба Рӯзи омӯзгорон ва Рӯзи забони давлатӣ ҳамоиши илмӣ–маърифати доир шуд

ДУШАНБЕ, 06.10.2026 /АМИТ «Ховар»/. Дар Донишгоҳи давлатии Кӯлоб ба номи Абуабдуллоҳи Рӯдакӣ бахшида ба Рӯзи омӯзгорон ва Рӯзи забони давлатии Ҷумҳурии Тоҷикистон таҳти унвони «Нақши омӯзгор дар ҳифз, рушд ва таҳкими забони давлатӣ дар шароити муосир» ҳамоиши илмӣ-фарҳангӣ баргузор гардид. Дар ин хусус ба АМИТ «Ховар» аз ин донишгоҳ хабар доданд.

Дар ҳамоиш оид ба мақому манзалати омӯзгор, рисолати касбии ӯ, нақши устод дар таълиму тарбияи насли ҷавон ва саҳми омӯзгорон дар рушди илму маориф ибрози андеша намуданд.

Изҳор шуд, ки омӯзгор дар ҷомеа на танҳо интиқолдиҳандаи дониш, балки тарбиятгари инсон, роҳнамои маънавӣ ва ташаккулдиҳандаи ҷаҳонбинии насли наврасу ҷавон мебошад. Омӯзгор ба инсон дониш омӯхта, ӯро ба андешидан, шинохтан, интихоб кардан ва созанда будан раҳнамун месозад. Аз ин рӯ, пешрафти ҷомеа ва фардои давлат ба сатҳи таълиму тарбия ва фаъолияти масъулонаи омӯзгорон пайванди ногусастанӣ дорад. Дар ин замина таъкиди Пешвои миллат муҳтарам Эмомалӣ Раҳмон ки «Ояндаи давлату миллат аз мактабу маориф оғоз меёбад», масъулияти аҳли илму маорифро боз ҳам бештар менамояд.

Гуфта шуд, ки забон хотираи таърихии миллат, оинаи фарҳанг ва василаи ба наслҳои оянда расонидани андешаву арзишҳои миллӣ мебошад. Дар ин раванд масъулияти омӯзгор махсусан муҳим аст, зеро устод на танҳо дониш меомӯзонад, балки ба шогирдон фарҳанги сухан, тарзи дурусти баён, эҳтиром ба забони давлатӣ ва арзишҳои миллӣ низ омӯзиш медиҳад.

Таъкид гардид, ки ҳифз, рушди забони тоҷикӣ ва истифодаи босаводонаи он вазифаи ҳар як шаҳрванди мамлакат буда, дар ин самт омӯзгорон ҳамчун намунаи суханварӣ ва фарҳанги муошират нақши калидӣ доранд.

Донишгоҳи давлатии Кӯлоб ба номи Абуабдуллоҳи Рӯдакӣ дорои таърихи беш аз ҳаштодсола буда, дар тӯли фаъолияти худ ҳамчун яке аз марказҳои муҳими омодасозии кадрҳои баландихтисос ва рушди илму маориф шинохта шудааст. Дар ин давра устодони зиёде дар рушди таълиму тарбия, таҳқиқоти илмӣ ва ташаккули муҳити маънавии донишгоҳ саҳми арзанда гузоштаанд.

Дар охир як зумра кормандони донишгоҳ барои фаъолияти содиқона ва саҳми арзанда дар рушди соҳаи илму маориф ва фаъолияти ҷамъиятӣ бо Нишони «Аълочии маориф ва илми Тоҷикистон», Ифтихорномаи Вазорати маориф ва илми Ҷумҳурии Тоҷикистон, Нишони «100-солагии матбуоти тоҷик», Шаҳодатномаи узвият ба Иттифоқи журналистони Тоҷикистон, Ифтихорномаи Иттифоқи журналистони Тоҷикистон ва Сипосномаи раёсати донишгоҳ сарфароз гардонида шуданд.

АКС: Донишгоҳи давлатии Кӯлоб ба номи Абуабдуллоҳи Рӯдакӣ