Дар Хадамоти гумруки Тоҷикистон Рӯзи забони давлатӣ таҷлил гардид

Октябрь 5, 2026 17:28

ДУШАНБЕ, 05.10.2026 /АМИТ «Ховар»/. Забони тоҷикӣ ҳамчун забони давлатӣ яке аз рукнҳои асосии давлатдории миллӣ ба шумор рафта, дар таҳкими ваҳдати миллӣ ва рушди ҷомеа мавқеи муҳим дорад. Чунин гуфта шуд дар маҷлиси тантанавӣ дар Хадамоти гумруки назди Ҳукумати Ҷумҳурии Тоҷикистон бахшида ба Рӯзи забони давлатии Ҷумҳурии Тоҷикистон.

АМИТ «Ховар» бо истинод ба Хадамоти гумруки назди Ҳукумати Ҷумҳурии Тоҷикистон иттилоъ медиҳад, ки дар маҷлиси тантанавӣ роҳбарияти Хадамоти гумрук иброз доштанд, ки забон яке аз муқаддасоти миллӣ буда, дар ташаккули худшиносии миллӣ, ҳифзи таъриху фарҳанг ва идомаи суннатҳои маънавии халқ нақши муҳим дорад.

Дар робита ба баланд бардоштани мақому манзалати забони тоҷикӣ ва рушду ҳифзи он дар раванди ҷаҳонишавӣ Президенти Ҷумҳурии Тоҷикистон муҳтарам Эмомалӣ Раҳмон пайваста таъкид менамоянд, ки соҳибзабонон бояд забони модариро ҳамчун арзиши муқаддаси миллӣ пос дошта, дар поку бегазанд нигоҳ доштани он саҳм гузоранд. Сарвари давлат муҳтарам Эмомалӣ Раҳмон таъкид намудаанд, ки «забон гавҳари бебаҳо, мояи ифтихор ва олитарин муқаддасоти миллии мост, ки аз гузаштагон мерос мондааст ва мо бояд онро барои наслҳои оянда дар шакли суфтаву такмилёфта ва поку бегазанд ба мерос гузорем».

Дар идомаи маҷлиси тантанавӣ кормандони Хадамоти гумрук оид ба нақши забони давлатӣ дар таҳкими худшиносии миллӣ, ҳифзи арзишҳои фарҳангӣ, арҷгузорӣ ба мероси ниёгон ва риояи меъёрҳои забони адабӣ маъруза намуданд.  Гуфта шуд, ки забон танҳо воситаи муошират набуда, балки таҷассумгари хотираи таърихӣ, тафаккури миллӣ ва таҷрибаи маънавии халқ мебошад. Забони тоҷикӣ давоми таърих барои ҳифзи асолати фарҳангӣ, интиқоли дониш ва идомаи суннатҳои маърифатии миллати тоҷик нақши муассир доштааст.

Таъкид гардид, ки дар шароити рушди босуръати технологияҳои иттилоотӣ ва густариши муносибатҳои фарҳангии ҷаҳонӣ баланд бардоштани маърифати забонӣ, риояи меъёрҳои забони адабӣ ва истифодаи дурусти забони давлатӣ аҳамияти хосса дорад. Кормандони мақомоти ҳифзи ҳуқуқ, аз ҷумла мақомоти гумрук бояд дар баробари донистани забони давлатӣ фарҳанги баланди суханро риоя намуда, дар тарғиби забони давлатӣ ва эҳтиром ба арзишҳои миллӣ саҳм гузоранд. Ҳифзу гиромидошти забони давлатӣ вазифаи ҳар шаҳрванди кишвар буда, арҷгузорӣ ба забони модарӣ омили муҳими таҳкими худшиносии миллӣ ва эҳтиром ба таъриху фарҳанги миллӣ мебошад.

АКС: Хадамоти гумруки назди Ҳукумати Ҷумҳурии Тоҷикистон

 

Октябрь 5, 2026 17:28

Хабарҳои дигари ин бахш

Пешгирии бемориҳои сироятӣ масъулияти ҳар шаҳрванд аст
Дар Пекин масъалаҳои рушди қонунгузорӣ ва таҷрибаи муосири давлатдорӣ баррасӣ гардиданд
Дар Москва ҷаласаи 11-уми Алянси Авруосиёии омбудсменҳо баргузор гардид
Бахшида ба Рӯзи Президент дар вилояти Суғд роҳпаймоии идона баргузор шуд
Ҳамкории ҳуқуқии Тоҷикистону Чин дар Пекин баррасӣ гардид
Рӯзи Президентро дар ноҳияи Ёвон бо баргузории чорабиниҳои гуногун таҷлил намуданд
Ба муносибати Рӯзи Президент ва Иҷлосияи XVI Шурои Олӣ дар бинои Ҳукумати  Ҷумҳурии Тоҷикистон ҷамъомад баргузор шуд
Дар мавзуи «Низоми идоракунии президентӣ ва таъмини амнияти давлатӣ» ҳамоиши илмӣ-амалӣ доир шуд
Дар мақомоти Ваколатдор оид ба ҳуқуқи инсон бахшида ба Рӯзи Президенти Тоҷикистон ҳамоиш баргузор шуд
СИЁСАТИ ХОРИҶИИ ТОҶИКИСТОН – НАМУНАИ ДИПЛОМАТИЯИ МУТАВОЗИНУ СОЗАНДА. Эҳдо ба Рӯзи Президенти Ҷумҳурии Тоҷикистон
Дар Душанбе таҳти унвони «Президент — симои миллат ва рамзи давлат» ҳамоиши ҷумҳуриявӣ доир шуд
РӮЗИ ПРЕЗИДЕНТ ВА ТАҶАССУМИ ИРОДАИ ТАЪРИХИИ МИЛЛАТ ДАР БУНЁДИ ДАВЛАТДОРИИ НАВИН. Мулоҳизаҳои академик Фарҳод Раҳимӣ