امامعلی رحمان، رئیس جمهور جمهوری تاجیکستان با هایکو ماس، وزیر امور خارجه آلمان دیدار کردند

دوشنبه، 30.08.2021 /”خاور”/. امروز بنیانگذار صلح و وحدت ملی – پیشوای ملت محترم امامعلی رحمان، رئیس جمهور جمهوری تاجیکستان با هایکو ماس، وزیر امور خارجه آلمان دیدار و گفتگو کردند.
در جریان این ملاقات طرفین در مورد مسائل همکاری دوجانبه بین تاجیکستان و جمهوری فدرال آلمان، موضوعات مهم دستور کار منطقه ای و بین المللی بحث کردند.
وضعیت پیچیده و نگران کننده در افغانستان محور مذاکرات طرفین بوده است.
رئیس جمهور تاجیکستان بار دیگر با ابراز نگرانی از وضعیت دشوار افغانستان و تاثیر آن بر منطقه آسیای میانه نظرات کشورمان را درباره وضعیت کنونی و پیامدهای آن بیان کردند.
رئیس جمهور تاجیکستان خاطرنشان کردند که یکی از عوامل تثبیت کننده وضعیت در افغانستان، ایجاد یک دولت فراگیر با مشارکت نمایندگان همه اقوام است.
رئیس جمهور کشورمان با اشاره به نقش سازمان ملل متحد بر لزوم اتخاذ اقدامات لازم زیر نظر سازمان ملل متحد و مشارکت فعال جامعه بین المللی در تشکیل دولت فراگیر در افغانستان تاکید کردند.
به گفته رئیس جمهور تاجیکستان، در این وضعیت فوق العاده دشوار، کشورهای قدرتمند نباید بی طرف بمانند و سعی کنند وضعیت کشور همسایه را تثبیت کنند، در غیر این صورت افغانستان می تواند درگیر یک جنگ داخلی طولانی شود.
رئیس جمهور تاجیکستان خواستار ارائه کمک های همه جانبه و هدفمند به مردم افغانستان در سایه بحران اقتصادی و اجتماعی شدند.
جمهوری فدرال آلمان و جامعه بین المللی برای ارائه کمک در تقویت و حفاظت از مرز بین جمهوری تاجیکستان و افغانستان ابراز علاقه کردند.
طرفین نسبت به تبدیل احتمالی افغانستان به پایگاه تروریست های بین المللی ابراز نگرانی کرده و آمادگی خود را برای مبارزه با تروریسم، افراط گرایی و جنایت های فراملی اعلام کردند.
وزیر خارجه آلمان گفت که از طریق مذاکرات و تشکیل دولت فراگیر به تثبیت اوضاع کمک خواهد کرد.