Кумитаи ҳолатҳои фавқулода аз боду борони шадид огоҳ мекунад

Душанбе, 02.11.2016 /АМИТ «Ховар»/. Кумитаи ҳолатҳои фавқулода ва мудофиаи граждании назди Ҳукумати Ҷумҳурии Тоҷикистон сокинон ва меҳмонони кишварро огоҳ мекунад, ки рӯзҳои 3-юм ва 4-уми ноябри соли равон дар қаламрави мамлакат (ба истиснои ВМКБ) ҳаво рӯ ба сардӣ меорад.
Тавре аз маркази матбуоти Кумитаи ҳолатҳои фавқулода ва мудофиаи граждании мамлакат иттилоъ доданд, дар ин рӯзҳо борон ва боди сарду сахт дар назар аст. Ҳарорати ҳаво дар водиҳо ба 10-15°С мерасад. Дар баъзе ноҳиҳои алоҳидаи кўҳӣ ва мавзеъҳои доманакўҳӣ борони шиддатнок ва дар ноҳияҳои марказӣ ва ҷануби мамлакат ба амал омадани чангу ғубор дар назар аст.
Бино ба иттилои манбаъ, ҳавои тағйирёбанда табиист, ки роҳандозии корҳои саҳроӣ, молчаронӣ дар чарогоҳҳо, кори рафтуомади мошинҳо, фаъолияти муассисаҳои алоқа ва хадамоти коммуналиву таъминоти барқро ба мушкилӣ рӯ ба рӯ месозад ва кормандони соҳаҳо ва ниҳодҳои мазкур барои рафъи мушкилот бояд омода бошанд.