ДАР ФУРУДГОҲИ ДУШАНБЕ ҚАРИБ 2 КИЛОГРАММ «ГЕРОИН» МУСОДИРА ГАРДИД

Душанбе, 11 сентябр. (АМИТ «Ховар», Мавҷуда Давлатзода).- Кормандони гумруки майдони ҳавоии шаҳри Душанбе сокини ноҳияи Роштқалъаи Вилояти Мухтори Кӯҳистони Бадахшон Бахтиёр Ҷӯнайдови 26- соларо дастгир карданд, ки мехост бо ҳавопаймои Душанбе-Самара миқдори зиёди маводи нашъадорро ба Русия барад. Аз маркази матбуоти Хадамоти гумруки назди Ҳукумати Ҷумҳурии Тоҷикистон ба мухбири АМИТ «Ховар» хабар доданд, ки ҳангоми азназаргузарони аз бағоҷи Бахтиёр Ҷӯнайдов ду бастаи селофанӣ зардолуи хушк ёфт шуд. Қочоқчӣ дар дохили ҳар як зардолу моддаи нашъадори героин ҷой карда буд, ки вазни холиси он 1 килограмму 895 грамро ташкил медиҳад. Б. Ҷунайдов ба кормандони гумрук иқрор шуд, ки маводи мухаддирро ба ивази 6 ҳазор доллари ИМА аз шахси номаълум харида, мехост онро ба Федератсияи Русия барад. Вобаста ба ин нисбати Бахтиёр Ҷунайдов парвандаи ҷиноӣ оғоз карда барои тафтиш ба прокуратураи нақлиёти Ҷумҳурии Тоҷикистон фиристода шуд.