ДАР САДАМАИ НАҚЛИЁТӢ 4 НАФАР ҲАЛОК ГАРДИД

Душанбе, 4 сентябр. (АМИТ «Ховар», Мавҷуда Давлатзода).- Дар роҳи мошингарди Душанбе-Хуҷанд фалокати калони нақлиётӣ рух дод, ки дар натиҷаи он 4 нафар ба ҳалокат расиданд. Аз маркази матбуоти Вазорати корҳои дохилии Ҷумҳурии Тоҷикистон ба мухбири АМИТ «Ховар» иттилоъ доданд, ки субҳи 3 сентябри соли ҷорӣ ронандаи мошини тамғаи «Митсубисӣ» (рақами давлатиаш ЕА 32-84 РТ 01) Фарҳод Юлдошеви 39-сола, истиқоматкунандаи кӯчаи Турақули шаҳри Истаравшанро ҳангоми ҳаракат дар километри 220-уми роҳи Душанбе-Хуҷанд дар вақти ҳаракати мошин хоб мебарад. Дар натиҷа мошин аз роҳ баромада, чаппагардон мешавад. Дар натиҷа, мусофирон Миршамшер Мирҷонови 50-сола истиқоматкунандаи кӯчаи Исписори шаҳри Душанбе, Фирдавс Набиеви 23-сола — истиқоматкунандаи ноҳияи Бобоҷон Ғафуров, Аюбҷон Муҳиддинови 50-сола — истиқоматкунандаи шаҳри Чкаловск ва Нурмаҳмад Абдураҳмонови 48-сола — истиқоматкунандаи шаҳри Хоруғ дар ҷои ҳодиса ба ҳалокат мерасанд. Худи ронанда Фарҳод Юлдошев ва дигар мусофирон Шӯҳрат Қаюмови 30-сола ва ноболиғ Абдураҳмони Фарҳоди 10-сола бо ҷароҳатҳои вазнини ҷисмонӣ ба беморхона фиристода шуданд.