ИҶЛОСИЯИ 63 – ЮМИ МАҶМАИ КУЛЛИ СММ КУШОДА МЕШАВАД

Душанбе, 16 сентябр. (АМИТ «Ховар», Наргис Бояхмедова). — Имрӯз дар Ню – Йорк иҷлосияи 63 – юми Маҷмаи кулли СММ кушода мешавад. Дар он муҳокимаи масъалаҳои муҳимтарини ҳаёти ҷомеаи имрӯза аз 23 сентябр то 1 октябр давом мекунад. Дар он сарони бештар аз 120 давлат, инчунин вазирони корҳои хориҷӣ ва сарони ҳайатҳо сухан мекунанд. Маҷмаи кулли СММ айни ҳол ягона мақоми умумибашарӣ мебошад, ки масъулияти таъмини сулҳу амнияти саросари ҷаҳон, рушди иқтисодӣ барҳам додани қашшоқӣ, аз байн бурдани бемориҳо, халъи силоҳ, таъмини ҳуқуқи инсон ва ҳифзи муҳити зистро ба зимма гирифтааст. Маҷмаи кулли СММ соли 1946 — ум 51 давлатро муттаҳид мекард, ҳоло шумораи мамлакатҳои аъзои он ба 192 расидааст. Дар иҷлосияи имсолаи Маҷмаи кулли СММ 160 масъала муҳокима карда мешавад.