НАМОЯНДАГОНИ ИДМ ҶАРАЁНИ ИНТИХОБОТИ ПРЕЗИДЕНТИ ОЗАРБОЙҶОНРО МУШОҲИДА МЕКУНАНД

Душанбе, 17 сентябр. (АМИТ «Ховар», Наргис Бойахмедова).- 250 нафар намояндаи Иттиҳоди Давлатҳои Мустақил ба мушоҳидаи ҷараёни тайёрӣ ба интихоботи Президенти Ҷумҳурии Озарбойҷон шурӯъ намуд. Ба гурӯҳи мазкур Котиби иҷроияи ИДМ С.Лебедев роҳбарӣ мекунад. Фаъолияти мушоҳидони ИДМ- ро ситоди махсус ҳамоҳанг месозад, ки 15 сентябр дар Боку ба кор шурӯъ намуд. Вазифаи ситод омода сохтани ҳуҷҷатҳо барои ба қайд гирифтани мушоҳидон, назорати давраҳои маъракаи интихобот,ҷамъ овардан ва таҳлил кардани ҳуҷҷатҳо, ташхиси қонунгузории интихобот ва инъикоси ҷараёни он дар матбуот, инчунин гузаронидани мулоқотҳои пешазинтихоботӣ бо номзадҳои мансаби Президенти Озарбойҷон ва тақсими гурӯҳҳои мушоҳидон дар минтақаҳои ин мамлакат мебошад.