ТАҶДИДИ РОҲИ ДУШАНБЕ-САРҲАДИ ҚИРҒИЗИСТОН ИДОМА ДОРАД

Душанбе, 22 сентябри (АМИТ «Ховар», Мавзуна Бойева).-Дар доираи Созишномаи қарзӣ байни Ҳукумати Ҷумҳурии Тоҷикистон ва Бонки Осиёгии Рушд таҷдиди роҳи автомобилгарди Нуробод – Рашт дар км 140-217 ва беҳтар намудани ҳолати қитъаи километри 12 – уми роҳи назди сарҳади Ҷумҳурии Қирғизистон (Қарамиқ) идома дорад. Бояд тазаккур дод, ки ин созишнома аввали соли 2006 ба имзо расида буд. Тавре дар Вазорати нақлиёт ва коммуникатсияи ҷумҳурӣ ба мухбири АМИТ «Ховар» иттилоъ доданд, ҳамчунин дар асоси ин созишнома, беҳтар намудани ҳолати 60 километр роҳҳои маҳаллӣ, хариди техника ва таҷҳизот барои нигоҳубини роҳ дар назар аст. Тибқи шартнома, корҳои сохтмониро дар ин шоҳроҳ ширкати «Синохайдро» — и Ҷумҳурии Мардумии Чин анҷом медиҳад. Айни ҳол корҳо дар самти ҳамвор кардани замин, шинонидани қубурҳои обгузар, бунёди ҷуйборҳои обпарто ва сохтмони таҳкурсиву такяагоҳҳои кӯпрукҳо дар ноҳияҳои Нуробод ва Рашт идома доранд.