ТАҶЛИЛИ ИДИ ИСТИҚЛОЛИЯТИ ТОҶИКИСТОН ДАР МАСКАВ

Маскав, 10 сентябр. (АМИТ «Ховар», Ҳалима Хушқадамова). – Дар сафорати Ҷумҳурии Тоҷикистон дар Маскав ба муносибати Иди истиқлолияти Ҷумҳурии Тоҷикистон зиёфати расмӣ ороста шуд. Сафири кабири Тоҷикистон дар Федератсияи Русия Абдулмаҷид Достиев ҷамъомадагонро хайра мақдам гуфта, зикр намуд, ки аз мардуми Русия ва вазорати корҳои хориҷии ин мамлакат сипосгузор аст. Зеро имрӯзҳо дар минтақаҳои Федератсияи Русия бо иштироки фаъолонаи мақомоти маҳаллӣ, аҳли ҷамъият ва зиёиёни эҷодкор ба муносибати 17- солагии истиқлолияти Тоҷикистон ҷамъомадҳои пуршукӯҳ баргузор мегарданд. Қабл аз ин ба шарафи 1150 — солагии асосгузори адабиёти классикии тоҷику форс Абуабдулло Рӯдакӣ маҳфилҳои адабӣ гузаронида шуданд. Муовини вазири корҳои хориҷии Русия Григорий Карасин изҳор намуд, ки «Ҷараёни истиқрори истиқлолияти Тоҷикистон хеле душвор ва пурфоҷиа буд, мамлакат дар ин давра санҷишҳои вазнинро аз сар гузаронд. Халқи тоҷик таҳти роҳбарии Эмомалӣ Раҳмон дар мамлакат созгории миллиро таҳким бахшида, роҳи пешрафти иқтисодиёт ва беҳтар сохтани шароити зиндагии мардумро пеш гирифт. Дар Русия ба муносибатҳои ҳамаҷонибаи ҳамкорӣ бо Тоҷикистон ҳамчун шарики стратегӣ ва боэътимод баҳои баланд дода мешавад». Дипломати Русия қайд кард, ки муносибатҳои ҳар ду мамлакат муттасил ва ҳамаҷониба густариш ёфта, ояндаи калон доранд. Мулоқоти Президентҳои Русия ва Тоҷикистон дар Душанбе дар доираи сафари расмии Д.Медведев ба Тоҷикистон ва мулоқоти сарони давлатҳои аъзои СҲШ дар бобати равнақу ривоҷи муносибатҳо ва ҳамкории дуҷониба саҳми калон гузоштанд. Ба қавли Г. Карасин, барои амалӣ сохтани паймонҳои дар Душанбе бадастомада мулоқоти охирини вазирони корҳои хориҷии ҳар ду мамлакат Сергей Лавров ва Ҳамрохон Зарифӣ нақши муайян мебозад. Онҳо зимни мулоқот мавқеъҳояшонро аз рӯи проблемаҳои муҳимтарини минтақавию байналхалқӣ мувофиқ сохтанд.