УСУЛИ НАВИ АМАЛИЁТИ ҚОЧОҚЧИЁН

       Душанбе, 27 ноябр. (АМИТ «Ховар», Мавҷуда Давлатзода).- Кормандони гумруки майдони ҳавоии шаҳри Душанбе сокини ноҳияи Роштқалъаи Вилояти Мухтори Кӯҳистони Бадахшон Далер Фирогатови 23 — соларо дар интиқоли маводи нашъадор гумонбар дониста, аз парвоз боздошт намуданд.       Аз маркази матбуоти Хадамоти гумруки назди Ҳукумати Ҷумҳурии Тоҷикистон ба мухбири АМИТ «Ховар» хабар доданд, ки ҳангоми азназаргузаронии бағоҷи мусофирони сайрхати Душанбе-Москва аз бағоҷи дастии Д. Фирогатов 3 бастаи селофанӣ мавиз ёфт шуд. Қочоқчӣ дар дохили ҳар як донаи мавиз лундачаҳои майдаи моддаи нашъадори героинро ҷой карда буд, ки вазни холиси он 796, 2 граммро ташкил медиҳад.  Д. Фирогаров ба кормандони гумрук иқрор шуд, ки ӯ ин миқдор маводро бар ивази қарзи пулӣ ба Федератсияи Россия интиқол диҳад.       Нисбати Далер Фирогатов парвандаи ҷиноӣ оғоз карда, барои гузаронидани тафтиши пешакӣ ба прокуратураи нақлиёти Ҷумҳурии Тоҷикистон фиристонданд.